Un situacion sumamente fastioso a sosode cu señora, kende mainta a lanta pa descubri cu “desconocinan” a bora tur e tirenan di su auto. Un acto di vandalismo condenabel.
E hecho aki a tuma luga den bisindario di Ponton. Riba e caminda di Cocorobana e doño di e auto marca Toyota Vitz number 57648 a splica Polis cu el a yega e cas di su amigo pa mey anochi.
El a dicidi di keda drumi na cas di su amigo. Rond di 11’or di mainta, e mester a bay busca yiunan di su amigo pero pafo el a topa cu un sorpresa desagradabel.
E no por a move cu su auto pasobra a bora tur e 4 tirenan di su auto, probablemente cu un cuchiu. Mesora el a yama Polis y e caso ta den man di autoridadnan cu ta haci un investigacion. Ta buscando tur camara cu tin instala na casnan den bisindario pa mira tur movecionnan sospechoso cu tabatin entre e oranan menciona. 
