E momento a yega pa cada habitante di nos isla responsabilisa su mes den oracion pa bienestar di nos isla, pasobra mirando e situacion social, laboral , moral,respet y especialmente e situacion di Famia y hubentud ta urgi nos cada un como habitante pa haci oracion.
Un luna pasa tabatin eleccion di cual nos tur sa e resultado, pero awor nos ta mira cu aunke nos tin gobierno, nos mester di Dios,pasobra pa Dios nada ta imposibel.
Ta berdad cu Dios ta usa hende pa yuda otro , pero hende mester ta den obedencia na Dios pa nan wordo usa, y e mihor forma di obedencia ta entrega bo bida na Cristo Hesus, somete bo mes completo na Dios y haci oracion cu Fe y nos tur lo gosa di e bienestar cu Dios ta manda pa nos pais.
Beibel ta mustra nos hopi motibo cu ta para scirbi cu ora un pais ta den oracion e pais por spera milager, pero ora un pais bandona Dios, e pais por spera dificultad. Beibel ta mustra nos hopi motibo y hopi situacion cu a wordo treci dilanti di Dios y Dios a saca su man Poderoso y a actua.
Y awor si e hendenan den pasado a kere, y confia den Dios, dicon nos di awendia no por? E pueblo di Israel mester a sali for di e sclavitud di Egypto nan a haci oracion y Dios libera nan. Abraham y Sara no por tabatin un yiu pa motibo di edad y infertilidad, Abraham a kere Dios y Isaac a nace, Elias a haci oracion na Dios y candela a baha for di Cielo. Elias a haci oracion awa a keda sin cay pa 3 anja, y despues e a haci oracion y awacero cay. Daniel a haci oracion y wordo tira den cueba di leon pero leon no por mishi cune.
Hesus tabata haci oracion na su Tata constantemente y milager tabata sosode. Anna no por a duna lus, e a haci oracion na Dios y a duna luz na Profeta Samuel. Salomon a haci oracion y pidi sabiduria pa dirigi e pais y Dios a dune sabiduria y e pais a haña un economia stabil. Ezequias tabata na cama di morto, e a haci oracion y Dios a dune 15 aña mas di bida. Ta para scirbi cu tur locual nos pidi Dios den nomber di Cristo Hesus y no duda den nos curazon, Señor ta hacie pa nos.
Hesus a bisa : Ami ta e ranca di bida , pega na ami boso por tur cos, lew for di mi boso no por nada. Hesus a bisa cu cada biaha cu nos ta haci oracion, pordona si nos tin algo contra un hende. Santiago Capitulo 5 vers 16 ta bisa cu e oracion di un hende hustu por hopi. Ta tempo pa Aruba uni den oracion, pa asina Aruba por mira e man di Dios move riba Aruba, pasobra pa Dios no tin nada imposibel.
