Jesse Larmonie, miho conoci como “Alaska” ta deteni y encarcela desde ayera tardi na ward’i polis pendiente un investigacion penal contra dje. Duaneronan a not’e ta actua straño y sospechoso y a bay pe mesora. A hay’e hunto cu un amiga, Ligia Aguirre. A detene ambos cu droga scondi den nan curpa.
E dos sospechosonan di Aruba, a cumpra pasashi pa bay Hulanda abordo di KLM. Larmonie tin un pasado criminal caba, pa cual el a sinta un castigo di prizon, precisamente pa biaha cu droga. Di eynan a bin e apodo “Alaska”.
Cu tempo el a bisa di a cambia di bida y a opta riba su mes pa cana e caminda corecto den bida. Tin un yiu homber chikito di apenas 5 aña di edad cu un cantante hoben. Kico a conducie na purba pasa droga atrobe den un biahe pa Europa, no ta conoci.
Investigacion lo mester determina si ta nan actuacion mes a “reda” nan of si ta un persona cu sa di su intencion, cu lo a duna “tip” na autoridadnan. Di otro banda, debi na su historia penal, di mes ta hacie un “target” pa extra control di Duana na momento di biaha pa Hulanda por ehempel.
Alaska sa ta hopi critico riba Facebook, den cual e ta atende specialmente temanan social. Recientemente e tabata para te dilanti durante e manifestacion “Ta Basta”. Ey el a hinca rudia dilanti Ministernan Evelyn Wever, Glenbert Croes y Andin Bikker. El a suplica nan pa haci algo pa e muchanan abusa y a admiti cu e mes tabata un victima den pasado.
