Dia 8 di februari ta di dos diaranson di luna combustibel tin prijs nobo, sea e ta baha of subi. Gobierno a caba di confirma e noticia di 24ora.com di ayera, solamente cu e aumento ta mas di locual a anticipa! Esunnan cu kier spaar poco florin cu un full tank mester yena nan tanki prome cu 12’or di mey anochi.
Gasolin ta conoce un aumento di 18,7 cen pa liter y esey ta pone cu e ta bira 262,5 cen pa liter. Diesel ta bira 260,3 cen pa liter, cual ta un aumento di 13,7 cen. Kerosin tambe ta aumenta y su prijs nobo ta 264,1 cen pa liter, cu ta un aumento di 35,5 cen! Tur prijs ta inclui BBO/BAZV/BAVP.
Mayoria di e placa di benta di gasolin cu diesel ta bay pa gobierno. Diferente forma gobierno ta genera hopi miyon for di e benta di combustibel. Gobierno ta genera miyones via accijns y tambe dos schakel di BBO, cu ta suma total 14% na BBO so.
