Mama di Richie Danies tabata biba den un fierno. E no por a drumi ni come trankil den su mesun cas. Cuminda cu e haci, mester sconde den cashi cu yabi pa miedo cu Richie ta pone veneno den dje, manera el a menasa. “Mi no tabata por mas,” Aida Danies a conta nos dilanti Corte, unda el a acudi pa pidi Corte prohibi Richie di yega cerca di nan. Hunto cu ne tabata su ruman homber Tico Danies.
Awe den oranan di merdia nomber di Richie Danies tabata riba rol, pa e acusacionnan cu tin contra dje di menasa (contra su mama y demas famia) pero tambe instigacion / agitacion. Tratamento di e caso ta sigui dia 5 di maart awo pa 8.30 di mainta. Richie tabatin reclamo cu ta tarda mucho pa trata su caso, siendo cu rapport di reclassering ta cla caba. Hues mester a splik’e e motibo ta simplemente cu Ministerio Publico mester di un ora y mey pa trata su caso. Y e fecha mas cerca cu tin e espacio aki habri ta 5 di maart.
Den sala tabata presente su mama, como partido perhudica y un omo.
Pafo e mama a comenta tur e tortura cu el a pasa aden cu Richie, kende ta su unico yiu. Un Richie cu a cambia cuatro (4) pasa te na un estilo cu e mama no ta reconoce mas. “Ta duelmi, pero e menasanan cu nos tabata haya constantemente di dje no tabata husto. Y bibando den e mesun cas. Bo no por drumi anochi pasobra bo no sa kico e por haci. Su pareha tabata instigue. Mi a dicidi di yama polis.” Esaki a sosode ora cu el a yega eynan cu un jerry-can cu menasa di kima nan. Esaki a bin despues cu el a haci cinco denuncia caba contra dje.
Ta hopi cos no solamente mama, pero tambe tanta y omonan a pasa den man di Richie cu a pone e emchi pasa over. Awor famia a cera cabes y a firma un carta pa pidi Corte y otro autoridadnan pa saca un ordo di restriccion, cu Richie no por yega cerca di nan. “Asina mes nos ta biba cu miedo ainda,” e mama a bisa.
