Den luna di october di aña 2021 tabata e lansamento oficial di Movementu21 (M21). E partido ta para pa integridad, solidaridad, honestidad y liderazgo firme. Nan tin un vision cla pa logra desaroyo integral. Na salida di un debate organisa na Club Trocadero a combersa cu e lider y un candidato pa haya sa mas di e vision di M21.
Daisy Coffie, lider di M21, a duna di conoce cu M21 ta e prome y unico partido social-liberal. El a continua bisando cu mayoria di partido na Boneiro ta socialista, social-cristian of cristian-democrata. M21 lo enfoca mas riba e hende su desaroyo segun e hende mes kier pa asina e desaroyo ta na prome luga. Pa e motibo ey tambe nan ta pro pa inverti den e hende.
Hopi biaha ta compara e sosten cu Hulanda ta duna e islanan BES compara cu e islanan CAS. A puntra Daisy Coffie su opinion tocante si e cambio/sosten aki a afecta e identidad cultural di Boneiro y su contesta na e pregunta ta cu kisas no door di e cambionan pero mas bien pa e falta di maneho y con pa atende cu nan propio asunto na cas mes.
El a continua bisando cu Boneiro tin hopi posibilidad debi na e structura nobo cu nan tin cu Hulanda. Boneiro tin hopi mas beneficio debi cu nan ta parti di Hulanda. Pero si no tin propio maneho of un maneho apropia na Boneiro, e cosnan ta sali fo’i man.
Awendia Boneiro ta conta cu un crecemento di e isla, sin cu e isla mes ta suficientemente prepara pa por maneha e desaroyo. Coffie a continua bisando cu ta necesario pa crea un bon maneho pa por atende cu e crecemento. E crecemento ta necesario pasobra asina Boneiro su economia ta draai pa por sigui tin un bon entrada.
Ademas crecemento mester bay man den man cu e area ecologico y socio-economico pa asina por mantene e area cultural como tambe e identidad di Boneiro. Coffie ta di pensamento cu si sigui tuma hende sin haci nada den e area di maneho pa mantene nan identidad, lo topa cu demasiado hende te cu nan propio identidad lo “pasa pa olvido”.
E cultura di Boneiro mester sali mas dilanti y actualmente e gobierno actual no tin maneho oficial stipula pa cultura. Un di e prome cosnan cu M21 lo haci, ora cu drenta gobierno, ta pa stipula un maneho caminda ta necesario.
IDEA PA UN HAF NOBO
Algun punto cu e comunidad Boneriano tin preocupacion cu ne ta e poder di compra. M21 su punto di bista riba esaki ta cu lo duna atencion na un haf nobo, asina por trece mas persona riba mercado pa trece mas producto Boneiro na un miho prijs. Tony Wever, candidato 11 riba lista M21, a duna di conoce cu un problema grandi cu tin na Boneiro ta e prijs di cas.
Como gobierno lo mester traha mas cas na un prijs cu e pueblo por paga, pasobra awo a ripara cu cada elite ta stipula prijs di cas. Mester trece mas opcion pa studiante pero tambe pa e persona cu apenas ta cuminsa. E idea ta pa tur persona por cumpra cas na un prijs rasonabel.
Si wak atras, tin algun punto cu Boneiro a mehora pero tambe tin cierto cos a bay atras. Locual cu ta sinti falta di dje ta planificacion duradero. Asina lo por tin un idea unda nan por bay aki dies aña of aki 20 aña. Partido M21 ta kere den introduccion di un Centraal Plan Bureau cu lo por stipula e diferente crecemento cu tin riba e isla y tambe con por maneha e crecemento den un manera duradero na beneficio di Boneiro.
Por ultimo Daisy Coffie, lider di M21, a pidi tur Arubiano cu ta biba na Boneiro pa duna M21 e mandato pa por drenta e Conseho Insular pa asina por sali pa nan derecho na Boneiro.
