Diabierna 27 di april ultimo, e comunidad di Aruba henter a celebra Dia di Rey. Den oranan di atardi, e organisadornan Aruba Triathlon Association a clausura e dia di celebracion cu e di 58 edicion di e careda mas prestigioso na Aruba esta e Aruba International Boulevardloop 10K Run.
Apesar di e biento duro y e solo cayente esaki no por a para e mas cu 350 participantenan a inicia e recorido di 10km cuminsando den e area di Malmok rumbo Aruba Ports Authority unda e evento a termina. Un aspecto cu semper a hasi e Boulevard Race unico contrario na otro eventonan di coremento na Aruba sin duda ta e cantidad di mirones y fiel fanaticonan para na banda di caminda ta apoya. Diabierna un bes mas a keda constata cu e cantidad di hendenan para na banda pa apoya ta hasi e careda di Boulevard uno unico. E apoyo duna na tur cu ta core na e momento ey ta algo cu ta pone uno sigui cu e trajectoria pisa y sobrevivi tur obstaculo.
Mester bisa cu e anja aki, e ganador absoluto di e Boulevard Race 2018 a resulta William Brain Diaz Quintero cu e core e careda den un tempo di 32:13, sigui pa Jesus Galea 36:25 y Jethro St. Fleur 36:39. Den e categoria femenino e ganadora a bira Lana Gobert cu e registra un tempo di 39:37 sigui pa Ali Banfield 45:36 y Kirah Regales 46:22
Stichting Sportsubsidie Aruba semper aportando na nos atletanan y e deporte local kier a manda un palabra di pabien na Aruba Triathlon Association, e organisadornan di e 58 edicion di e Boulevard Race como tambe na tur cu a engrandece e prestigioso evento aki un bes mas, specialmente esnan cu a cay den premiacion.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
