Gobierno tin e proyecto di FASE y Loonsubsidie cu ta andando. E proyectonan aki lo sigui na vigor. Loonsubsidie ta e subsidio duna na doño di trabou pa mantene hende na trabou y esaki ta bay sigui.
Hulanda ta subsidia e proyecto aki. FASE ta un otro proyecto y no ta conta cu subsidio di Hulanda. E ta un proyecto cu Aruba mes a bin cu ne ora e crisis a dal, tabata palabra di mr. Evelyn Wever-Croes Minister presidente. Esaki tabata pa evita cu hende termina sin nada den nan man.
Segun e mandatario, nan a actua hopi lihe pa bin cu e proyecto aki y awo ta buscando e forma di mas facil pa transforma FASE pa TIO. Hende no lo perde su entrada pero ta bira algo mas structural. Minister di Labor, Glenbert Croes, ta trahando riba dje p’asina esunnan cu ta den FASE por haya un sosten via TIO. Esaki ta pa nan por para bek riba pia propio y haya un trabou un biaha mas. Aruba su economia ta cambiando y e pandemia a cambia hopi cos.
