No ta di awo tin e peticion pa para e construccion di Ocean Villas, sino di basta tempo caba. Den pasado tabatin hasta protesta dilanti di e luga, indicando cu e grupo cu ta traha riba e structura aki ta haci daño na e mangelnan y/of medio ambiente.
Ayera durante dia, corte a dicidi cu tur construccion mester para te ora cu haya un veredicto di e kort geding.
E caso aki ta entama di parti di Fundacion Parke Nacional Aruba hunto cu Fundacion Proteccion y Conservacion di Commandeursbaai y Vecindario contra pais Aruba y J.O.B. Leisure & Events VBA y J.O.B. Holding & Management VBA, e grupo responsabel pa ‘Aruba Ocean Villas’.
Den e ‘ordemaatregel’ mientras cu e kort geding ta tuma luga ta prohibi e grupo pa sigui cu e construccion y tambe busca pa cualkier permiso pa sigui cu e actividadnan di construccion. Y si no cumpli cu esey lo e tin cu paga un suma.
Hues lo tuma su decision riba e caso aki dia 28 di mei proximo.
