Lissette Gomes: Sentencia awe ta indica cu palabra di mucha no tin balor

Fundacion Lisette Gomes a keda decepcion cu e sentencia den Corte unda cu un Pastoor a wordo declara liber di e acusacionnan cu el a mishi cu pecho di un menor.
Ta trata di un caso cu a tuma luga for di 2016. Segun Lisette Geerman Gomes a conta, e mucha en cuestion ta bayendo e scol di e Iglesia ey for di su 3 aña y semper el a wordo siña door di su mayornan con e mester cuida su mes y kico hendenan no mag haci cun’e. Y ta pesey dia di e sucedido e mesun dia el a conta su mama kico a pasa.

E mayornan mesora a hib’e haci denuncia. Pero ta parce cu e investigacion no tabata bon haci, pasobra Polisnan no a bay na e scol mes, unda e hecho a sosode, pa haci investigacion y interoga otro hendenan.
E mama mes dado momento a cuminsa fada pasobra despues di un aña e caso no a bini dilanti, pa cual el a cuminsa manda carta te cu finalmente e aña’ki nan a tende cu e caso ta bini dilanti Hues.

Gomes a bisa cu e ta haya e decision di Corte, pa declara e Pastoor liber di e acusacionnan, sumamente lamentable. “Den e caso aki e ta bay pa e palabra di un mucha contra e palabra di un hende grandi. Asina esun di e mucha no tin balor.”
“E decision aki ta un sla, principalmente pa e mayornan, pasobra hopi hende lo puntra pakico bay entrega keho si nan mishi cu mi yiu, si no tin prueba fisico. Den leynan Hulandes declaracion di un persona no ta suficiente, y mester di steunbewijs.

Mester tin testigo, pero hamas lo bo haya testigo pa tipo di casonan asina. E malhechornan no ta bay actua dilanti di otro persona. Pa violacion tin e “rapekit” pero pa mishimento ta dificil haya prueba. Pa nos e ta duro y e nifica cu nos mester sigui pusha riba e parti preventivo,” Gomes a duna di conoce.

Pa finalisa Gomes a bisa cu ta lamentable cu autoridadnan no a bay haci investigacionnan necesario na e sitio mes y investiga loke ta wordo bisa den e declaracionnan di e luga unda e cos a sosode, pa mira si nan ta cuadra. Tampoco a papia cu trahadonan. “Un homber di edad asina halto cu no tin nada di haber cu e scol ki mishi’e ta kishiki e muchanan. E no ta aceptabel. Pami e ta culpabel y despues a bini mas mucha pero pa miedo y berguensa, pasobra nada no ta pasa, no kier haci denuncia.”