Departamento di ambulance na ImSan ta pendiente pa loke ta tur novedad di tempo y e servicio di ambulance a cambia nan sistema di shift. A cambia esaki na diesdos ora.
Liberato Hoek, hefe encarga cu ambulance ImSan, a bisa cu e orario ta di 8:00 am pa 8:00 pm y den cada shift tin cinco ambulance. Na momento cu comunidad mester asistencia di ambulance, nan tin di yama 911 of por yama 100. Nan ta prefera pa yama 911 pa motibo cu eynan ta haci mas un filter specifico pa locual ta e parti medico.
Nan ta spera cu tur hende ta consciente di e tempo y ta spera hopi awasero. P’esey Hoek ta pidi, ya cu ta bay tin shelter in place, si no tin nada di haci riba caminda pa keda cas y asina evita pa haya bo mes den un incidente of accidente.
Aparte di tin cinco auto, tambe tin un auto para specificamente p’e area di pariba si no tin acceso. Pa banda pabou nan tin cuater auto, pero si ta necesario ta manda mas auto pariba. Tur cos ta depende dje situacion di tempo y unda e ta afecta mas tanto.
