Conforme e stipulacion den ley, Camara di Comercio y Industria (KvK) ta representa comercio y industria di Aruba. E directiva di KvK, cu ta consisti di nuebe miembro, ta eligi door di representantenan di negoshinan grandi “grootbedrijf” como tambe di negoshinan chikito “kleinbedrijf”. Den e prome reunion di directiva di KvK, e miembronan ta eligi un presidente y un vice-presidente pa e aña actual. Alabes ta keda determina cual miembro lo fungi como e presidente suplente. E presidente y vice-presidente, hunto cu e secretario/director ehecutivo, ta forma e directiva diario di KvK.
Pa aña 2023, e miembronan di directiva a eligi unanimamente Gavril Mansur como presidente y Monica Kock como vice-presidente. Demas miembro ta Wanda Broeksema, Eugene Farro, Diederik Kemmerling, Lay Hing de Kort-Yee y Omar Tromp, cu lo fungi tambe como presidente suplente den caso cu e presidente of e vice-presidente ta ausente. KvK a tuma despedida di Daniel Ferara y a yama bonbini na Robert Croes y Derrell Maxwell. E directiva di KvK ta encarga cu e maneho y strategia di e organisacion, cu asistencia di e secretario/director ehecutivo, Martijn Balkestein kende alabes hunto cu e personal di KvK ta percura pa e funcionamento y actividad diario di KvK.
Un team cu tin comercio na pecho
E directiva ta consisti dje empresarionan cu tin Aruba y e sectornan comercial na pecho y cu den nomber di sector priva ta traha duro pa mantene bon comunicacion cu sector publico. Directiva di KvK ta dispuesto pa sigui duna su aporte y lo keda boga pa tin mas dialogo entre gobierno y e sector priva pa asina conhuntamente por atende e diferente puntonan di atencion y di preocupacion di e sector comercial. KvK lo percura pa ta mas activo e aña aki y lo organisa diferente actividadnan pa ricibi feedback di nos empresarionan y tambe pa KvK por comparti informacion y experticio.
Ken ta Gavril Mansur
Gavril Mansur a studia entre aña 1988 pa 1992 na Wheeling Jesuit College na Merca y a logra diploma na nivel bachelor den maneho y mercadeo. Despues el a sigui studia na Wheeling University entre 1992-1994 pa logra su MBA den “Finance, Marketing and Management”. E tabata Senior Account Manager na Caribbean Mercantile Bank N.V., pero awendia ta ocupa e puesto di Assistant Managing Director di CMB, pues ta di dos homber den un di e banconan mas grandi di Aruba.
Gavril tin 52 aña di edad, ta casa y tin dos yiu. E mes ta yiu di Alex y Ola Mansur. E ta ruman di Serge, Alex jr., Faride, Fania, Sashah, Valeska y Tino Mansur.
