Directie Infrastructuur en Planning (DIP) a tuma nota di e incidente cu a tuma luga na Baby Beach diasabra dia 14 di januari, entre un empleado di DIP y cu e doño di e establecimento Big Mama Grill. DIP ta lamenta loke a sosode y a manda pidi e empleado concerni pa e traha un relato di loke a pasa. Tambe DIP a manda invita e empresarionan di Big Mama Grill pa un reunion pa nan por duna nan version di e caso.
Ta asina cu internamente, riba nivel ambtelijk, y segun e ley di R.O.P.V, tin un proceso andando pa establece un linea di maneho fiho pa loke ta trata e tereno y espacio den e area aki di costa di Aruba.
Sinembargo, ainda no ta asina leu cu por sinta na mesa cu tur stakeholder. Asina cu e proceso aki ta cla, lo invita tur esunnan concerni pa hunto soluciona cada un di e casonan aki segun ley y regla ya estableci.
