Camara di Comercio y Industria Aruba (KvK) ta urgi tur compania cu tin cobransa pendiente pa contribucion anual di aña 2019 y añanan anterior, pa haci e pago mas pronto posibel. Si pa final di october 2021 KvK no ricibi e pago of e compania no a haci un areglo di pago, ni tampoco a informa KvK si e compania ta operando ainda of cu no ta haci actividad comercial mas, KvK lo bay over na “doorhaling” di e compania conforme articulo 14, lid 3 di e Handelsregisterverordening (A.B. 1991 no. GT 15).
Fabor di tene bon cuenta si cu e obligacion di e compania pa actualisa su inscripcion den e Registro Comercial y pa paga e contribucion anual pendiente ta keda vigente. Pesey ta haci un apelacion na tur compania cu no ta operando mas, pero cu ainda ta inscribi den Registro Comercial, pa cancela e inscripcion mas pronto posibel of informa KvK tocante e status actual di e compania. Esaki ta aplicabel tambe pa “eenmanszaken” cu a stop di funciona como tal, pero cu nan actividad(nan) a wordo continua bao di un otro entidad cu tin permiso pa opera (“NV” of “VBA”).
Tur compania cu ta registra den Registro Comercial ta ricibi conforme ley un cobranza pa contribucion anual. Desde 2019 e cobranza y recordatorio ta wordo manda digital via e compania su “MijnKvK-account” of via post.
Pa mas informacion tocante e cobransa y pago di e contribucion anual por tuma contacto cu KvK na tel. 582-1566 ext. 27/36, e-mail [email protected]. Den caso cu no a traha un account digital ainda of pa cualkier pregunta encuanto e inscripcion di bo compania of e procedura(nan) di cancelacion, fabor di tuma contacto cu KvK na tel: 582-1566, ex. 35/42/30 of email [email protected] y nos lo asisti bo persona.
Loading…
Reload document 
Open in new tab 
