Autentico Culinary Festival a reuni restaurant, bar, chef y studiante di cushina pa celebra e rikesa gastronomico di Aruba, cu e platonan tradicional y autentico. E evento ta brinda tambe un plataforma pa talento local presenta nan habilidad culinario y comparti e sabor di e cushina Arubiano cu residente y bishitante.
Gemey Zara, PR & Corporate Communications Specialist di Aruba Tourism Authority (ATA), a destaca cu esaki ta e di tres edicion di Autentico Culinary Festival y cu e actividad di e dia aki a tuma luga na The Pavilion. Segun Zara, e festival ta reuni comunidad y bishitante den un ambiente unda diferente sabor y plato tradicional ta haya nan luga.
“Nos ta hopi contento cu un aña mas nos por organisa un evento asina, cu ta reuni no solamente nos hendenan local, sino tambe nos bishitantenan, pa celebra diferente sabor y platonan tradicional y autentico. Esaki ta mustra cu Aruba tin un oferta culinario masha amplio”, Zara a declara.
Zara a splica cu cada aña ATA ta invita diferente participante, incluyendo restaurant y bar, pa inscribi y forma parti di e festival. Na final, e representante di ATA a expresa su gradicimento na tur bendedo, chef, studiante, scol y partner cu a contribui n’e organisacion di e evento, destacando nan colaboracion pa haci e edicion un exito.
Studiante di EPI ta presenta platonan local
Zulaine Francees, studiante di Culinary na Colegio EPI, a conta cu e grupo a prepara diferente producto pa presenta y bende durante e festival. Entre e platonan tabatin Keshi yena, wrap, kroket di cabrito y calco di conch.
Francees a indica cu e preparacion di e productonan a tuma luga na scol, unda e studiante y su grupo a dedica aproximadamente un siman na prepara tur loke tabata necesario pa participa den e actividad.
E studiante a expresa su alegria p’e oportunidad di presenta nan trabou y laga publico purba e cumindanan cu nan ta prepara durante nan formacion. Segun e, e participacion ta brinda e studiantenan un oportunidad pa comparti cultura culinario di Aruba y mustra e tipo di conocemento y habilidad cu nan ta desaroya na scol.
Francees a gradici e chef, e docente y e otro personal di scol cu a guia y apoya e grupo durante e preparacion y participacion n’e festival. E a destaca cu e experiencia ta permiti nan siña mas y aplica nan conocemento culinario den un ambiente practico, fuera di klas.
Cu participacion di profesional di gastronomia y studiante, Autentico Culinary Festival ta brinda un espacio pa celebra e diversidad di sabor di Aruba y pa duna visibilidad n’e talento local cu ta contribui na desaroyo di su cultura culinario.
