Tabata diamars ultimo dia 23 di april merdia mas o menos 2:30pm cu Polis a detene Kenny Dirksz den area di Zeewijk, como e sospechoso principal di a asesina Natasha Kock di 33 aña e mesun mainta ey den su cas situa den Tobelstraat na San Nicolas. E sospechoso tin dos yiu cu e victima. Diabierna Hues Comisario a prolonga su detencion, pendiente e investigacion.
E sospechoso ta cera ainda na Warda di Polis di Santa Cruz. Ey a sak’e diabierna ultimo pa hib’e dilanti Hues Comisario cu scucha e acusacionnan contra dje y despues a dicidi riba su prolongacion. E sospechoso lo permanece encarcela por lo pronto, mientras ta investigando kico a sosode den e cas cu conduci e homber pa asesina su pareha.
E acusacion ta bastante serio, asesinato/homicidio cu na Hulandes lo bisa doodslag y moord. Cu esey Fiscal ta investigando e sospechoso di ambos acusacion, pues sea el a comete e acto den forma premedita of a bin eynan bringa cu e victima y despues mat’e. Ministerio Publico ta sospech’e awo di ambos acusacion.
Kenny Dirksz ta naci dia 3 di februari 1966 y tin dos yiu cu Natasha Kock. Bisiñanan a conta cu el a yega e cas mainta y despues a bandona e cas manera nada no a pasa. E no a informa ningun hende di locual el a caba di comete.
