Den fin di siman a tuma luga e apertura dje campeonato 2022/2023 di Aruba Basketball Bond. Ta conta cu cinco team afilia n’e federacion.
Kenneth Vrolijk, presidente di Aruba Basketball Bond, a indica cu teamnan ta Aruba Juniors, Club Estrella, Steelers, De Vuyst Impact y CO3 Dream Basketball. Den e campeonato aki nan ta conta mas cu dos shen atleta. Ta bay di division mini te open class adulto. E federacion a prepara p’un campeonato exitoso cu a cuminsa den fin di siman y ta bay te cu final di juni 2023.
Vrolijk a splica cu segun schedule e teamnan di pasarela, esta U14 y U16, ta hunga riba diasabra. Mayoria wega di U18 ta riba diadomingo y diabierna, pero tambe tin e open class cu ta hunga riba diaranson.
Pa por haya e schedule e federacion ta pone esaki riba nan pagina di Facebook, unda tur hende por mira unda e weganan ta tuma luga pero tambe si tin cambio nan lo informa esey. E federacion ta invita pueblo di Aruba pa presencia e weganan.
Pa loke ta cantidad di persona cu ta presenta, el a splica di ta depende di e division. E ta kere cu tur federacion tin esey. Mas chikito un mucha ta, mas mayor ta presenta pa apoya. E aña aki tin un grupo di mayor, grupo di fanatico, pareha dje hungadonan cu ta yega pa mira wega.
