Riba diadomingo 27 di november 2022 Aruba a conoce dos morto den trafico. Un den oranan di marduga riba e caminda di Ponton y e otro riba L. G. Smith Boulevard. Ana Rosa Montaño Martinez ta e di diesdos morto den trafico pa aña 2022. Un auto a baha caminda y alcans’e djey lag’e atras. Famia ta pasando den momento sumamente dificil. E fayecido a bay laga dos yiu y cuater nieto atras.
Despues di e incidente, famia, amigo y conocinan a topa hunto riba e plasa dilanti di edificio di Juliana School na Playa. Ey e comunidad Dominicano a pasa y duna famia y amigo palabra di forsa den e momentonan dificil aki. E team di 24ora.com/TREMPAN tambe a presenta p’asina ricibi mas informacion riba e caso y pa duna consuelo na famia. Di biaha a duna nan e oportunidad pa dirigi nan mas n’e comunidad y duna un mensahe n’e persona cu a ocasiona e accidente aki.
Francisco Florentino ta pareha di e fayecido, durante e entrevista cu 24ora.com el a conta cu e ta hopi tristo. Rosa a notific’e mainta prome cu sali di cas cu e ta bay cana un rato riba Linear Park. Ta su rutina di tur dia. E ta cana gran parti parti mainta y tin ora parti atardi. Pa 7:30 pm hospital a yam’e y inform’e cu su pareha a fayece. Florentino ta lamenta masha hopi mes di e sucedido aki. Si e persona cu a alcans’e, por a sikiera yama ambulance y notifica di e accidente, awe Ana Rosa Martinez por ta na bida, segun Francisco Florentino, kende ta e pareha di e señora. E señora a yega na bida na hospital y despues di un rato, a fayece. E ta boga pa e persona of su famia, pa entrega su mes pa por splica kico exactamente a sosode. E ta importante pa e famia sa kico a pasa. E famia ta den un bashi y kier splicacion. Florentino ta compaña cu Rosa pa diesdos aña caba. Rosa mes a biba como binti aña na Aruba. Rosa ta doño di Ana Rosa Beauty Salon situa net pabou di di mas na Playa. A notifica su famia kende ta den exterior y ya ta planeando pa bin Aruba pa bin wak nan ser keri. Rosa tin un yiu na Merca y un na Republica Dominicana. Di e cuater nietonan cu el a bay laga atras, tin un cu nunca el a mira. E tabatin pasashi cumpra caba pa bay wak e den exterior. Demas amigo y conoci ta boga pa husticia. Tur a bin hunto pa demostra nan malcontento.
Durante e transmision di 24ora.com, comisario di polis Robert Candelaria a presenta pa duna palabra di profundo condolencia na famia y sigura nan cu Cuerpo Policial ta trahando duro pa resolve e caso mas pronto posibel. Candelaria a presenta mirando cu e departamento di trafico ta cay bou di su encargo como comisario nobo di polis. Candelaria tabata presente na tur dos accidente fatal, tanto na esun na Ponton como esun riba L.G. Smith Boulevard. Candelaria a informa e famia cu polis ta haciendo nan maximo esfuerso pa compila mas hopi evidencia y presenta e caso na Ministerio Publico pendiente autorisacion pa bay over na detencion.
