Despues di 5 aña di ausencia di eleccion, ayera nochi un biaha mas tabatin e concurso di Miss Universe Aruba y pa casualidad nos por a conta cu 5 participante.
Pa un tempo tabata djis scoge un representante y prepar’e pa participa den e certamen di Miss Universe. Miss Universe Aruba 2022 tabata Kiara Arends.
Ayera nochi e presentacion a cuminsa cu Milenka Janssen, Lorraine Oduber, Anaisa Orman, Gavriëla Bozo y Karol Croes cu a presenta den bikini, trahe di gala y por ultimo tabatin sesion di pregunta.
Na final di e anochi a entrega e siguiente premionan:
Mom Award: Anaisa Orman
Most Inspirational: Gavriëla Bozo
Most Disciplined: Milenka Janssen
Most Photogenic: Karol Croes
Miss Congeniality: Lorraine Oduber
Despues di tur e premionan a saca e “Top 2” cu tabata Gavriëla Bozo y Karol Croes. Na final a corona Karol Croes como nos Miss Universe Aruba 2023. Karol Croes lo representa Aruba na El Salvador dia 18 di november den e di 72 edicion di e certamen aki.
Croes a expresa di tin bunita experiencia den fase di preparacion prome cu a yega pa e anochi final. Na mesun momento el a bisa cu e ta cuminsa prepara su mes di biaha pa e eleccion final na El Salvador. “No laga miedo stop bo,” ta su mensahe.
Contrario na eleccionnan di antes, awo e participantenan por ta casa y inclusive tin yiu. Esaki ta regla cu a cambia den e organisacion internacional y cu e organisacion local a ehecuta e cambionan.
