Parlamentario di AVP, John Hart, ta enfatisa cu e aumento di salario minimo pa acerca esaki na bestaansminimum ta un decision cu ta toca e bienestar di famianan y e tipo di sociedad cu Aruba kier construi. Pa Hart, e discusion mester wordo guia pa e dignidad di e trahado, hunto cu responsabilidad pa e sostenibilidad di empresanan y e economia.
“E pregunta fundamental ta kico ta nos responsabilidad como sociedad pa garantisa cu un hende cu ta traha fulltime por mantene su mes y su famia na un manera digno. Un hende cu ta cumpli cu su obligacionnan y contribui diariamente na nos economia mester tin e posibilidad pa cubri su necesidadnan basico,” Hart a expresa.
E parlamentario ta identifica cuater principio cu, segun dje, mester guia e proceso: husticia publico, responsabilidad comparti, solidaridad y rentmeesterschap, esta bon maneho y responsabilidad pa futuro.
Husticia pa e trahado
Pa Hart, husticia publico ta inclui e responsabilidad pa trata hende husto, ofrece oportunidad y evita cu ciudadano ta keda atras. Den e sentido aki, e ta cuestiona con un trahado cu ta dedica un siman completo na su trabou ainda por keda sin suficiente entrada pa cubri e gastonan esencial di su hogar.
“Un salario minimo mester proteha e trahado contra explotacion y ofrece un base di dignidad. Trabou mester duna hende perspectiva pa construi un bida cu stabilidad. Husticia social ta nifica cu un hende cu ta traha mester por sali dilanti,” Hart a declara.
Responsabilidad comparti cu sector priva
Hart ta señala cu gobierno, empresanan, trahadonan, famia y comunidad tin un papel den e construccion di un sociedad mas husto. Gobierno mester establece e marco legal, proteha trahadonan y crea condicionnan pa un economia saludabel. Sector priva tambe tin responsabilidad pa e bienestar di e hendenan cu ta contribui na su actividadnan.
Segun e parlamentario, salario ta un inversion den hende, productividad y futuro economico. Alabes, e ta reconoce cu empresanan tin diferente capacidad financiero. P’esey, e ta boga pa dialogo, planificacion y medidanan di sosten, specialmente pa empresanan chikito, como parti di e implementacion.
E ta pone enfasis particular riba sector hotelero y e necesidad pa evalua cuanto di e ganashi genera cu e producto “Aruba” ta regresa na sociedad, tanto den salario y condicionnan di trabou como den contribucionnan concreto na bienestar di comunidad.
Progreso mester yega na famianan
Den su apelacion pa solidaridad, Hart ta pidi atencion pa e mama of tata cu, a pesar di tin un trabou, na final di luna mester scoge entre paga huur, cumpra cuminda of cubri otro necesidad esencial.
E ta enfatisa cu e dificultad pa yega na fin di luna por refleha e distancia entre entrada y costo real di bida, a pesar di e esfuerso diario di e trahado.
“Nos mester midi progreso tambe na e calidad di bida di nos pueblo. Crecemento economico mester traduci den mas siguridad, oportunidad y bienestar den e casnan di nos famianan,” Hart a expresa.
Cambio responsabel cu perspectiva pa futuro
Hart ta splica cu rentmeesterschap ta aplica tambe na e maneho di economia, finansa publico y capital humano. Pa e parlamentario un economia sostenibel mester ofrece trahadonan e posibilidad pa cubri nan necesidadnan basico.
E ta reconoce e importancia di atende e posibel efectonan riba gastonan di empresa, prijs y oportunidad di trabou. P’esey, e ta propone cu e aumento forma parti di un vision mas amplio cu ta inclui productividad, formacion profesional y fortalecemento di empresanan local.
Hart ta sostene cu acerca salario minimo na bestaansminimum mester ta un meta social y economico, cu un proceso basa riba dato, dialogo y un plan di implementacion realista. E ekilibrio entre proteccion di trahado, sostenibilidad di empresa y stabilidad economico mester distribui responsabilidad hustamente entre e sectornan.
“Nos tin un responsabilidad cu e generacion di awe y cu nos yiunan y nietonan. E meta ta cu trabou duna hende un bida digno, cu esfuerso tin balor y cu progreso bira un realidad pa tur hende di Aruba,” Hart a conclui.
