Despues di e Black Out cu a afecta Aruba awe, coriente a cuminsa bin bek. WEB a reanuda e suministro di electricidad na ELMAR, permitiendo cu e proceso pa reestablece coriente na clientenan por cuminsa.
Segun un comunicado actualisa di ELMAR, su team di tecniconan a cuminsa cu e trabounan pa reestablece e suministro, cuminsando den area di Kooyman.
E suministro ta tuma lugar gradualmente. E inicio di e proceso no ta nifica cu tur cliente tin coriente bek caba. Na momento di e comunicado, no a indica un horario pa ora cu henter e suministro lo ta reestableci.
Facebook Live
ELMAR a informa cu lo sigui mantene prensa y comunidad na altura di e progreso di e trabounan y e reestablecimento di coriente den e diferente areanan.
UPDATE 3:25 PM: A reestablece e suministro di coriente den e area Kooyman, parti di Paradera, Sabana Berde, Pricesmart, Plaza Padu, Cumana, Avenida Milio Croes, Sabana Blanco, un parti di Savaneta, Pos Chiquito, Santa Cruz, Balashi, Parkietenbos, area di Hospital, Punta Brabo, low-rise hotels y Riu Hotel na Palm Beach..
UPDATE 3:50 PM: A reestablece e suministro di coriente den e area di ImSan na San Nicolas, Seroe Colorado, Pietheinstraat, Brazil y mas. Entretanto produccion ta na 91MW y subiendo.
UPDATE 4:15 PM: A reestablece e suministro di coriente den e area di Arawak na Noord, otro parti di e area Palm Beach, otro parti di e area di San Jose y mas.
UPDATE 4:23 PM: Suministro di energia di WEB pa ELMAR ta 100%. A logra recupera di e blackout dentro di 2 ora y 23 minuut. Ta gradici un y tur pa nan pasenshi y un biaha mas ta ofrece nos disculpa pa e inconveniencia.
