Parlamentario di AVP, John Hart, ta expresa su satisfaccion cu e reciente anuncio di Proyecto Burubundu, un iniciativa di gran escala cu lo contribui significativamente na e necesidad urgente di mas vivienda accesibel pa famianan Arubiano. Segun Hart, e proyecto ta confirma cu dialogo constructivo, perseverancia y vision a largo plaso por produci resultado concreto pa comunidad.
E topico di vivienda semper a ocupa un luga central den e Partido di Pueblo Arubano (AVP). Segun e parlamentario, e realidad cu hopi ciudadano ta enfrenta actualmente ta preocupante. Pa un gran parti di e poblacion, cumpra un cas propio a bira cada bes mas dificil debi na prijsnan halto, falta di oferta y e desafio di logra financiamento adecua.
“Tin hopi famia, pareha hoben y trahadonan cu ta haci tur loke ta den nan poder pa progresa, pero aun asina ta haya nan mes confronta cu un mercado di vivienda cu no semper ta accesibel. Esaki no ta solamente un reto economico; ta un reto social cu afecta calidad di bida, stabilidad familiar y e futuro di nos comunidad,” Hart a expresa.
Precisamente pa e motibo ey, durante e debate parlamentario di maart 2025 tocante infrastructura y desaroyo nacional, Hart a habri un dialogo amplio cu e minister responsabel riba e necesidad di un plan concreto pa aumenta acceso na vivienda. Posteriormente, durante e vragenuur di maart 2026, e parlamentario a presenta un serie di pregunta critico pa haya claridad riba e vision, strategia y prioridad di gobierno tocante vivienda.
Durante e debate ey a indica cu un proyecto importante tabata den preparacion. Cu e anuncio oficial di Proyecto Burubundu den luna di mei 2026, e promesa ey a bira realidad y a habri un caminda nobo pa cientos di famia cu ta busca oportunidad pa bira propietario di nan mes cas.
Proyecto Burubundu ta inclui entre 850 y 1.000 unidad residencial, consistiendo di casnan, apartamento y flat moderno. Ademas di e componentenan residencial, e plan maestro ta contempla area berde, espacio recreativo, facilidadnan deportivo y diferente servicio comunitario cu lo contribui na e calidad di bida di futuro residente.
Parlamentario Hart a enfatisa cu e anuncio di e proyecto ta un stap importante, pero cu e siguiente reto ta implementacion. Pa e motibo ey, e ta comprometi pa sigui monitor e proceso y tene gobierno responsabel pa e ehecucion oportuno di e iniciativa.
“E pueblo ta sperando accion. Awor cu e vision a wordo presenta, ta importante cu e proceso administrativo y preparacionnan tecnico sigui avansa cu determinacion pa e prome piedra por wordo poni den e plaso mas cortico posibel,” Hart a declara.
