E pintor di arte visual y escultor Rubiano, Claude Wever, a presenta su exposicion nobo titula “Memorianan Subconsciente”. Naci na Sero Colorado, e artista ta uza canvas pa materialisa su bishitanan, investigacionnan y experiencianan structural cu a keda graba den su mente.
Segun Wever, e subconsciente ta warda recuerdonan di biahamento, pelicula, buki of imagennan di Facebook. Na un cierto momento, e recuerdonan aki ta bin bek dilanti, creando un reaccion profundo basa riba sintimento y pensamento. E exposicion aki ta confronta e bishitantenan cu pinturanan cu lo lanta e sintimento di “mi a yega di mira esaki of bishita e luga aki”, captando asina e berdadero esencia di arte.
E artista ta duna e proyecto aki un balor altamente educativo p’e hubentud, destacando cu sin arte visual, nos cultura no por yega leu. El a recorda cu tempo e tabata jong, e mentalidad tabata cu arte y deporte no ta duna ganashi pa biba di dje. Sinembargo, tempo a evoluciona y a demostra cu cultura sin arte no por existi.
Awendia, e sociedad ta compronde e necesidad di tin arte rond di dje. Arte ta manifestá den tur forma, for di den media te riba un simpel flyer of folder. Wever ta enfatisa cu no por devalua e balor aki, ya cu arte mester keda evoluciona hunto cu nos identidad. “Nos cu arte hunto, nos ta arte, arte ta nos cultura,” e pintor a conclui, invitando e publico pa confronta nan propio memoria den e exposicion singular aki.
Pa mas detaye lesa TREMPAN.
