Como resultado di e reunion reciente cu representantenan di SIMAR, Presidente di e Comision Permanente di Enseñansa, Otami Thomasia, ta comparti aki un di dos parti di loke ta e preocupacion, recomendacion y puntonan concreto cu a sali for di e dialogo sosteni algun dia pasa.
Segun Thomasia, ademas di e cambionan structural cu naturalmente lo tuma mas tempo, a sali tambe diferente situacionnan cu docente ta considera inhusto y cu por coregi den corto plaso. “E puntonan aki no mester warda pa reforma grandi. Nan lo wordo presenta na e Minister di Enseñansa pa busca solucionnan practico y inmediato unda esey ta posibel.”
Un di e preocupacionnan mas serio cu a sali durante e reunion ta cu cada bes mas docente ta considera laga e profesion pa busca oportunidadnan den sector priva. “Esaki no ta simplemente un percepcion; ta un realidad cu mester preocupa nos tur. Ora nos perde docente cu experiencia, conocemento y vocacion, nos no solamente ta perde personal, nos ta perde capacidad, stabilidad y calidad den nos sistema educativo.”
Thomasia a adverti cu si Aruba no tuma e decisionnan corecto awor y no pone construccion di un sistema di apoyo y cuido pa docente entre su prioridadnan nacional, e pais por enfrenta un reto ainda mas grandi den futuro. “No solamente lo bira mas dificil pa retene docente, pero tambe pa atrae un generacion nobo di docente, psicologo, logopedista, ortopedagogo, asistente di klas y otro profesionalnan pa drenta den enseñansa.”
Segun e parlamentario, Aruba mester aspira pa un sistema educativo caminda docente ta sinti cu nan ta aprecia, respeta, sostene y scucha. Un sistema caminda e carga no ta cay solamente riba e maestro, pero caminda tin un red di apoyo profesional rond di e scolnan. Un sistema caminda muchanan cu necesidadnan special por haya e guia cu nan merece y caminda docente por concentra riba loke nan haci miho: educa, inspira y prepara nos futuro generacion.
Thomasia a enfatisa cu e preocupacionnan y recomendacionnan comparti durante e reunion cu SIMAR no lo keda den e salon di reunion, sino cu nan lo forma parti di e trabou cu lo continua den Parlamento. “Mi compromiso ta pa sigui defende e necesidadnan di nos docente, sigui facilita dialogo cu e sector y sigui impulsa e cambionan necesario pa fortalece enseñansa den Aruba. Pasobra si nos kier un futuro mas fuerte pa Aruba, nos mester cuminsa cu fortalece esnan cu cada dia ta forma e futuro di nos muchanan.”
Concluyendo, Thomasia a declara: “Un sistema educativo fuerte no ta construi riba edificio of documento, sino riba docente cu ta sinti cu nan ta sostene, aprecia y duna e hermentnan pa logra exito. Ora nos fortalece nos docente, nos ta fortalece futuro di Aruba.”
