recientemente sra Arends- Reyes a hasi entrega di preguntanan cu a bai pa Minister di Turismo contesta Parlamento tocante e suma cu gobierno lo mester haña di ATA pa 2020.
Tin indicacion cu tin sumanan cu a wordo acorda den Ministerraad for di fondo di Emergencia di ATA lo mester bai pa gobierno, mescos cu e decision pa gobierno haña 12.6 miyon pa DOW nan maneho di operacion.
No ta descarta cu DOW lo mester e fondonan pa mehora operacion pero esey no kiermen cu gobierno por dicidi den Ministerraad cu ta aloca e fondonan y ATA lo mester cumpli sin mas, siendo cu tin regla y proceduranan pa yega na e fondonan di emergencia di Turismo.
Mescos den pasado a presenta cu Parlamento den su totalidad a logra conhuntamente pa purba yuda Tiara Air cu 1 miyon, awor ta sumanan mas grandi cu lo mester saca di e fondo di emergencia pa gobierno y ta Ministerraad so ta dicidiendo. Den pasado a percura pa e fondo di emergencia di Turismo ta saludable cu den un caso cu por evita un calamidad of su efectonan Aruba lo tin fondonan aparta pafor di presupuesto pa por actua rapidamente. Tawata tin situacionan cu a yega di presenta caminda mester a aloca mas fondo pa mercadeo durante aña pa motibo di factornan externo y ta netamente e ora ey ta bin Parlamento, splica, haña un base amplio y ta ehecuta. Ta keda awor pa Minister contesta e preguntanan y tambe pa evalua bon e proceduranan y impacto di e decisionan pa 2020 sra Arends-Reyes ta termina bisando.
