Pa Ministro Otmar Oduber insinua, manera ami a lesa den Diario siman pasa, cu Jan van Nes ta contra di e hotel na Baby Beach “pasobra … e ex-director di ATA mes tin un restaurant den un di e condominiumnan pabao di nos isla” ta iracional, ta un lamentabel cuestionamento di e integridad di Jan, ta un insulto cu Jan no ta merece.
Y pa Minister Otmar Oduber bisa cu e tin hopi respet pa Jan van Nes despues di a cuestiona su integridad, mi ta puntra mi mes, ” Con e por tin respet pa un persona di ken e ta cuestiona su integridad? Sr. Oduber no ta realisa e daño cu el a haci na Jan su persona?”.
Manera Minister Otmar Oduber mes a admiti, hopi ta opone e hotel. Entre otro e ta menciona Gregg Peterson di ABC, e Partido Raiz, varios ONG, politiconan, etc., etc., cu a vocifera nan oposicion na e hotel. Nan no tin restaurant pabou di brug! Jan van Nes ta djis un di miles cu ta contra e hotel cu Minister Otmar Oduber ta defende cu hopi animo, apesar cu e gobierno mes a declara un moratorium tocante mas hotel.
Den tur e medionan di comunicacion bo por a lesa cantidad di comentario contra e hotel, contra di agrega un hotel mas, na unda cu ta, na Aruba. Pa bisa cu Jan van Nes ta contra pasobra e tin restaurant pabou di brug ta parce mi absurdo.
Ami conoce Jan van Nes pa mas di 10 aña como miembro di directiva di Aruba Scholarship Foundation. Cu su trabou den directiva, Jan a contribui inmedibelmente pa e fundacion por a yuda nos hobennan, futuro di Aruba, bay studia afor. Cu su trabounan den sector Horeca, Jan a contribui enormemente na crecemento di turismo di Aruba.
No ta mi tarea pa duna un relato di e trayectoria di Sr. Jan van Nes den e mundo di turismo, pero ta basta pa bisa cu e e tawata na timon di Aruba Tourism Authority pa cinco aña y Manager di hotel na Aruba pa mas di 20 aña, dus nos mester conclui cu e sa di kico e ta papia. Como experto, Jan tin deber di duna su opinion na bienestar di nos comunidad y seguramente e mester wordu scucha sin ataca su integridad. Pa awor Ministro Otmar Oduber cuestiona Jan su capacidad di husga pasobra e, mescos cu miles otro, ta opone e hotel na Baby Beach, no ta acceptabel ni husto.
Cu su atake personal, Minister Otmar Oduber ta sigi e politica anticua di atake personal na esnan cu ta opina contra maneho di gobierno. Den siglo 21 e flie aki no ta subi mas. Atakenan personal mester stop. Absolutamente. Den politica, den deporte, den sindicalismo, den comercio, den tur area di bida.
Mi ta spera cu Minister Otmar Oduber reflexiona riba loke el a aludi na Jan Van Nes.
