Presidente di Organisacion di Pensionado Publico di Aruba (OPPA), Ivo Valdes ta splica cu e siman aki a bini un informacion di Departamento di Impuesto (DIMP) cu berdad e prima di AZV ta baha cu 1.5%. Aña pasa e tabata 6.5% te cu AWG. 30.000 di entrada of salario di un empleo den pasado. Awor e ta bira 5%, y esey ta haci cu un pensionado cu tin 54.000 ta paga 5% riba e prome 30 mil, e restante e lo paga 10,5%.
E prima maximo te cu 2023 tabata AWG. 7,725, pues un reduccion di AWG. 450 pa aña, cu ta AWG. 37,50 pa luna.
“Mi ta spera cu por bin un campaña pa eleccion di otro aña nos poblacion ta bisa y hacie tambe, exigi for di nos politiconan cu nos no kier sigui den e mesun direccion cu nos ta bayendo.” Valdes ta splica cu un politico mester corda cu e no t’ey pa yena su saco cu placa, e t’ey pa yuda e pueblo.
Tin un desigualdad financiero enorme bao di nos poblacion anto esey no ta na su luga, mester haci algo contra esey segun OPPA. Dus pa e motibo aki ta boga pa haci un Budget Onderzoek unda por haya sa cierto data mas lihe.
“E 37,50 aumento di entrada, pa ta honesto, no ta nifica gran cos, pasobra costo di bida ta come e cen cu nos ta haya, tanto e reparatie toeslag como e 37,50. Dus ban wak si nos por haya mas y por lo menos bin cu un fondo separa, no di Sociale Zaken – mi no sa kico mester haci pero mester bin un fondo pa yuda hende cu ta den necesidad grandi aki.” Un di cada cuater pensionado ta biba den pobresa, cual kiermen cu nan entrada no ta yega pa cumpra nan productonan di prome necesidad.
OPPA ta puntra dicon gobierno no ta bin cu un Budget Onderzoek, un investigacion unda asina por indica si e reparatie toeslag di 45 florin a yuda. OPPA ta keda enfatisa y puntra ki dia gobierno di Aruba ta bay haci un investigacion bao di e pensionadonan na Aruba, of ta asina cu nan no kier wak e desigualdad economico cu ta existi bao di e poblacion.
Ta puntonan cu OPPA ta keda trece pa dilanti, si gobierno no ta interesa pa sa con su ciudadanonan adulto mayor ta bibando cu tur e aumentonan di impuesto por ehempel. Cuanto pensionado cu su unico entrada ta e pension di AOV (SVb), ta biba bao di e ‘armoedegrens.’
