N.V. ELMAR ta invita profesional y studiantenan cu ta biba of studia na Hulanda pa topa cu nan team durante FRED Job Fair & Conference 2026, cu lo tuma lugar diasabra 24 di october 2026 na WTC Rotterdam, cuminsando pa 11:00 AM.
Despues di su participacion na FRED na 2025, ELMAR ta bolbe e aña aki pa sigui conecta cu talento interesa den oportunidadnan profesional na Aruba. Durante e evento, bishitantenan por pasa na booth #25 pa conoce mas tocante ELMAR, nan cultura di trabou, e rol cu nan compania tin den desaroyo di Aruba y e oportunidadnan profesional cu por presenta den diferente area di nan organisacion.
Actualmente ELMAR tin y ta anticipa diferente oportunidad profesional pa 2026 y 2027, entre otro den area di ingenieria, informacion tecnologico, technology, siguridad, finansa y project management. Algun di e posicionnan ta inclui Information Security Engineer, Maintenance Specialist, Safety & Security Officer, Data Engineer, Electrical Engineer y Project Manager – Team Planning & Projects.
Cu sector di energia den constante desaroyo, ELMAR ta busca pa conecta cu profesionalnan cu ta interesa den un futuro profesional na Aruba y cu kier contribui na desaroyo di energia, economia y nos isla.
Como parti di e programa di FRED 2026, ELMAR tambe lo participa den e panel discussion “Keeping the Islands Running: Aviation, Energy & Tourism as Economic Engines”, bou di e tema: What keeps the Dutch Caribbean moving forward? Durante e panel, Melissa Ritfeld di N.V. ELMAR lo participa hunto cu Dutch Caribbean Air Navigation Service Provider, Aruba Airport Authority N.V. y Curaçao Marriott Beach Resort y The Pyrmont Curaçao Beach Resort.
E combersacion lo enfoca riba e rol fundamental cu aviacion, energia y turismo tin como motornan economico di Caribe Hulandes, y con e sectoranan aki ta contribui na continuidad, crecimiento y desaroyo futuro di nos region. E panel discussion ta programa pa 1:00 PM te 1:20 PM na WTC Rotterdam.
ELMAR ta anima tur profesional y studiante na Hulanda cu tin interes den oportunidadnan profesional, energia, tecnologia, servicio y desaroyo di Aruba pa pasa na booth #25, papia cu nan team y descubri mas tocante e posibilidadnan cu ELMAR tin pa ofrece.
Fecha: Diasabra 24 di october 2026
Ora: For di 11:00 AM
Lugar: WTC Rotterdam
ELMAR Booth: #25
Panel Discussion di ELMAR: 1:00 PM – 1:20 PM
Pa mas informacion tocante FRED Job Fair & Conference, bishitawww.fredexpo.com.
ELMAR ta spera di topa cu nos profesionalnan y studiantenan na Rotterdam. E energia cu ta uni nos!
