Dia 6 di maart Mitch Almary conhuntamente cu Tsunami Aruba a participa den e ‘Festival Un Canto pa Aruba su Himno y Bandera’ cu e cancion ‘Hunto Nos Ta Lanta Bek’. E anochi aki Mitch Almary a sali e di dos luga. Hunto Nos Ta Lanta Bek ta composita pa John Freddy Tobon Montoya y Edselyn Figaroa. E ta aregla pa Michael Odor.
Mitch Almary a yega di competi varios biaha den e festival aki, algun bes su so pero tambe den compania di Maya Marin. Segun Mitch mes a conta den un entrevista, e tabatin pensa cu esaki lo ta su ultimo aña den e festival pero na mes momento el a laga esaki den man di Maya Marin como cu nan a palabra pa nan bay hunto pa ultimo biaha. Na 2016 Mitch y Maya a gana cu e cancion ‘Arubiano Ta Esun’.
‘Hunto nos ta lanta bek’ ta papia cu nos por perde tur cos pero nunca nos Fe den Señor.
Trayectorio den festival:
2013: Curason- Mitch & Maya (Ganado)
2015: No pag’e calor – Mitch (Segundo luga)
2016: Arubiano ta esun – Mitch & Maya (Ganado)
2018: Agente di Paz – Mitch (Ganado)
2022: Hunto nos ta lanta bek – Mitch (Segundo luga)
LETRA
Hunto Nos Ta Lanta Bek.
Solo:
Pa mas cu awacero anuncia tempestad,
pa mas cu e olanan suta furia di horcan.
Pa mas cu hende purba tur manera pa nos cay,
un Arubiano ta lanta, gara e Bandera y lucha bay.
Nos por perde tur cos, pero nunca fe den Señor,
aunke zonidonan di guera ta causa nos dolor.
Maske un nubia scur por tapa nos solo su claridad,
aunke nan corta nos halanan y nos no por bula mas.
Nos Himno ta entona, cu Dios por guia y conserva,
Esey ta muestra di nos fe, ban sigui demostr’E.
Nos Bandera ta bula halto purbando yega unda bo ta,
p’e roga bo pa proteccion pa nos dushi nacion.
Nos por perde tur cos, pero nunca fe den Señor,
por fabor no preocupa, bao su hala nos ta proteha.
Si bo a perde un famia of amigo mucho trempan,
djis tene mi man, mi ta lanta bo mi ruman.
Pregon:
Solo: Hay Aruba, mi Aruba.
Coro: Hunto nos ta lanta bek.
Solo: No perde speransa aunke trompica.
Coro: Hunto nos ta lanta bek.
Solo: Tin mil motibo pa recupera.
Coro: Hunto nos ta lanta bek.
Solo: Hay Aruba, mi Aruba.
Coro: Hunto nos ta lanta bek.
Solo: Saca un man yuda bo ruman.
Coro: Hunto nos ta lanta bek.
Solo: Corda cu Dios ta na prome luga.
Coro: Hunto nos ta lanta bek.
Solo: Bira wak rond di bo,
saca un man yuda awor,
tene man di bo ruman.
Coro:Hunto nos ta lanta bek.
Solo: Bira wak rond di bo,
saca un man yuda awor,
tene man di bo ruman.
Coro:Hunto nos ta lanta bek.
Aruba habri bo curason, Aaah…!
y nunca perde fe den nos Señor. Aaah…!
Djis tene duro na su man,
E n’ ta laga bo cay,
su amor ta bibo y di berdad.
Aruba pensa riba union, Aaah…!
awor no ta tempo pa niun discusion. Aaah…!
Nos dushi isla mester di nos,
e ora ta awor,
haci’e pa nos futuro generacion.
