No mas cu algun dia pasa caba, comunidad a cuestiona e profesionalismo di e fiscalnan di Ministerio Publico, ora cu hues-comisario a dicidi, den un sentencia cu a bin manera un ‘onvoldoende rapport’ pa fiscal mr. Thomas Rethmeier, pa laga ex-minister Otmar Oduber den libertad pa falta di prueba den e caso Flamingo. Ayera e mesun Ministerio Publico a haya un otro sla bo faha, ora cu un otro hues, den e caso aki mr. W. Winfield, a declara e sospechoso di e mata Poentje Castro liber.
E caso tin su storia
Tin hende cu, deliberadamente, a percura pa daña henter e investigacion. Asina recherchenan di e tempo aya a sigura cu nan a investiga y a laga e caso cla, pero cu ta e fiscal a faya. Di otro banda, Ministerio Publico ta insisti cu ta e recherchenan a haci un mal trabou y cu e investigacion no tabata bon suficiente. Na final, famia di Poentje Castro a keda sin por haya un “closure” den e caso di asesinato. Casa y yiunan ta keda sin contesta, sin sa kico a sosode y dicon a mata nan casa y nan tata. Un supuesto midimento di forsa entre polis y fiscal, a keda cu un solo perdedo, famia Castro!
Den top di polis tambe a “sjoemel” cu e caso
No por keda sin menciona cu tabatin un comisario di polis cu den forma delibera a drumi riba e caso. No tabata kier pa e recherchenan di Oranjestad sigui cu e investigacion, a laga e caso bira un “cold case” y despues a pas’e pa e seccion di crimennan organisa. Pero, como cu nan no a cuminsa cu ne, nan tampoco a bula riba dje pasobra e pensamento ta cu esun a dañ’e y lo a hib’e pa nan drech’e…locual nan no a desea di haci. Asina a haci cu e caso a keda pega te ora cu a opta pa mand’e Hulanda. Polisnan di Hulanda a revisa e trabou haci pa e recherchenan di Oranjestad di e tempo aya, bou guia di ex-inspector Carlos Hodge y a contesta cu e caso ta masha bon y “ata boso tin un sospechoso caba. Deten’e pa caba”.
E prome tratamento di e caso na maart 2022
Na fin di maart tabatin e caso Pro Forma contra e homber sospechoso Anderson Rasmijn, sospecha di a mata John Anthony Castro, miho conoci como Poentje. Ora cu e caso aki a bini dilanti pa prome biaha den Corte, e abogado mr. Vito Carlo a cuestiona cu no a laga traha rapport psikiatrico. A pospone e tratamento pa laga traha un rapport di e acusado. Ora cu e caso a bolbe Corte pa mira ki tempo e tratamento por sigui, hues a wordo sorprendi cu no por haya un psikiatra pa evalua pa cual a bolbe laga haci un intento. Na maart a haya un specialista pero e rapport no tabata cla ainda.
Asesinato di Poentje
E personalidad di television, Poentje Castro di 47 aña di edad, conoci pa su programa “Un dia den bida”, a ricibi un tiro mortal den cabes riba 23 di december 2010. Den e prome kwartaal di aña pasa, den forma sorpresivo, a habri e caso aki, cu a bira manera un cold case. Esaki a base di datonan nobo ricibi. A detene un persona, kende despues a wordo laga liber y despues a detene Anderson Rasmijn, kende ta sintando un castigo den KIA pa un otro delito.
Fiscal a pidi famia di Poentje Castro disculpa pa mal investigacion
Ora a trata e caso algun siman pasa, fiscal tabatin algun palabra pa famia y hasta a pidi despensa pa e “falta” di investigacion tempo di e sucedido. Na inicio e fiscal a papia cu ta importante pa famia tin “closure” pa sa kico a pasa. Pakico y dicon ta e pregunta den e caso aki desde dia di e sucedido.
Fiscal a bisa cu na aña 2010 debidamente a haci un investigacion, pero no a logra haya dato pa husga e persona pa e asesinato. Mester menciona si cu e recherchenan cu a conduci e caso 11 aña pasa a sigura cu nan investigacion tabata “waterdicht” pero fiscal Jaap Zondevan e tempo ey a nenga di draai e caso pasobra e tabata teme cu e evidencianan no tabata suficiente pa wanta dilanti hues.
Na momento cu un fiscal nobo a tuma e caso y a dun’e e nomber Apollo 2.0 el a conclui cu e trabou haci 11 aña pasa tabata masha “slordig” y cu el a pasa den hopi problema pa haya e documentonan inicial. Den Corte el a splica cu e sa cu na 2010 a haci basta investigacion, a scucha testigonan y tambe tabatin investigacion tecnico y forensico realisa. Inclusive, a hasta interoga Rasmijn e tempo aya, pero no a yega na e punto cu por a entreg’e un dagvaarding.
“Ta facil pa despues papia y bisa hopi cos, pero si mi por comenta di e investigacion haci e tempo ey a base di loke mi a haya,” fiscal a comenta. Asina den un forma hopi sincero e fiscal a bisa cu e tempo aya e trabou di recherchenan no a tuma luga di un forma optimal y di parti Ministerio Publico mes no a duna suficiente guia na e investigacion. P’esey tambe el a pidi disculpa na tur esunnan concerni, pero principalmente na famia di defunto Poentje Castro.
Loke hopi hende no sa ta cu na 2019 a dicidi di habri e investigacion di nobo, pero door di e pandemia di COVID cu a bini directamente su tras algun luna despues, e caso a bolbe keda para un rato. Tabata te na november 2020 cu e fiscal nobo a yega y a dicidi di sigui cu e investigacion y e caso e ora a haya e nomber Apollo 2.0.
Ta e momento ey a bin descubri con “slordig” a traha, segun por a deduci for di palabranan di e fiscal ora cu el a splica e situacion cu el a hereda. Pa cuminsa no por a haya e dossier original di e investigacion haci na aña 2010. E team investigativo di Cuerpo Policial Aruba a busca e documentonan intensivamente. Pa gran parti a logra, pero e no por nenga cu tambe tin otro datonan di e investigacion cu no a logra haya e originalnan mas. E tabata sincero pa bisa cu cosnan no mester ta asina y e mes a cataloga esaki como “slordig”.
E caso di asesinato ta keda un misterio!
Ministerio Publico a trece un acusacion cu ta bisa: Intencionalmente y premedita a kita bida di e victima. Den e caso aki mes fiscal a expresa cu ta bon pa famia haya “closure”? sinembargo no por duna nan un contesta riba e pregunta di “pakico a mata Poentje Castro” pa motibo cu e acusado no kier bini dilanti y splica esaki.
Tin un solo acusado, e yama Anderson Rasmijn. El a admiti cu e tabata na e sitio o sea den bisindario. Pero e ta nenga cu el a mata Poentje. Ministerio Publico a bisa e tabata actua straño pasobra el a para su auto leu y despues a bolbe na careda cu man scondi bou di su T-shirt. Kico e tabatin bou T-shirt? Fiscal no por a bisa kico esaki tabata pasobra nan no sa ni a mir’e; ni ningun otro hende a mir’e cu e arma den su man.
Husticia ta paga awe pa eror di ayera
No tin ningun testigo cu a mir’e cerca di e cas di Poentje Castro y tampoco tin filmacion cu e tabata bini for di e cas di Poentje. E unico filmacion ta cu e ta den e caya pazuid di e supermercado Bo Chang y den Spechtstraat. E acusado mes ta nenga. Ni un biaha el a admiti di a mata Poentje Castro y hala atras.
A detene Anderson Rasmijn na aña 2011 pero no a haci ningun test pertinente di resto di polvo riba e pañanan confisca cu e tabatin bisti e anochi di e sucedido. E tabatin e pañanan aki ainda warda den un maleta. Pakico no a investiga e otro puntonan menciona door di testigo y a concentra solamente riba Anderson Rasmijn. Tur tip ta valioso.
Caso ta basa riba teoria y no echo
Fiscal mes a bisa den su rekisitorio cu el a dicidi pa concentra riba Anderson Rasmijn pasobra e tabata e unico sospechoso, mientras cu e mes algun minuut prome a pidi su disculpa pasobra e investigacion tabata laga hopi di desea y cu no a haya hopi parti di e proces-verbaal of cu a perde. Pakico no a cuminsa ful e investigacion di nobo y di e forma ey concentra riba tur e tipnan cu a drenta?
Varios tip cu no a investiga
Testigo a bisa cu tabatin un auto e anochi ey na cas di Poentje Castro cu mas hende den dje. No a bay riba dje; tabatin scooter sospechoso cu dos persona riba dje e anochi ey, pero no a sigui riba e pista aki; tin blackberry cu sanger y no a mencion’e mas; muraya tin mancha di sanger y no a bay riba dje. Si Poentje a cay y fayece mesora despues di e tiro, di con e muraya tin mancha di sanger. E persona cu a tira Poentje tabata den su cura y a bula pa huy. Ki tipo di sanger e tabata y ta mescos cu esun riba e Blackberry?
Ministerio Publico hayando hopi sla den corte
Loke por bisa si ta cu ultimo tempo Ministerio Publico a trece varios caso dilanti cu ta mustra falta di informacion, cu investigacion no completo of cu no tabata necesario mes pa hiba e caso dilanti hues pasobra tabata bisto cu e pruebanan ta mustra lo contrario, of no tin prueba mes of no a investiga tur cos. Por ehempel e caso di un hungado profesional di poker hiba dilanti mesa berde pa labamento di placa: Liber.
Un di e casonan cu sigur hopi ta cuestiona ainda ta e caso di baranan di oro cu ta yegando su di cinco aña cu a tuma luga. No tin investigacion andando y cada biaha ta keda pospone. Y asina tin mas caso cu ta mustra hopi duda of falta di investigacion.
