E tabata un caminda largo cu a cana, pa awe nos por a alcansa un logro asina. Corte di Prome Instancia a reconoce e rol importante di prensa, y den esaki specialmente esun di 24ora.com, cu mester educa y informa comunidad riba tur desaroyo cu ta impacto nos pueblo. Despues di varios deliberacion, a logra haya aprobacion pa por tabatin un camara den sala di corte pa graba e sentencia ayera den e caso Apollo 2, esta e asesinato di Poentje Castro.
Nos no por keda sin reconoce e insistencia di nos coresponsal di casonan di corte, Maritza Maduro, cu tabata den contacto cu hues di prensa, mr. Debby Angela, pa por a coordina e grabacion historico. Nos colega Jason Inesia tabata den sala di corte y a haya acreditacion pa por a graba e sentencia completo, mara na algun condicion. Manera semper, nos a tene nos mes na e condicionnan stipula y Aruba completo por a scucha y mira e hues na momento di dicta e sentencia den e caso lamentabel aki di 12 aña pasa.
Cu e logro aki ayera, awor lo sigui traha riba un miho relacion cu Corte pa por logra mas di e tipo di transmicionnan asina, den cual pueblo henter ta pendiente pa sea e tratamento di un caso of e sentencia final.
Headlines Group, e cas editorial di 24ora.com y e corant TREMPAN ta orguyoso di e logro. “Nos no ta solamente prome den noticia sino prome den corte tambe”, asina Mark-Benson Denz, director di Headlines Group, a bisa ayera despues cu a caba di transmiti e sentencia completo.
