E presencia di Coronavirus y e lucha pa evita plamamento ta hincando mundo completo den retonan nobo. Cierto parti di comercio ta full plat. Tin otronan cu ta pasando den un situacion hopi dificil pa sobrevivi. Na Aruba despues cu a anuncia Toque de Queda anochi pa mainta y Shelter in Place durante dia, a cuminsa tambe cu controlnan pisa. E controlnan ta consisti di un Taskforce cu diferente departamento envolvi.
Den siman y fin di siman tabata sali controla. Rednan social tabata publica hopi cos y esey tambe tabata cierto informacion pa bay confirma loke tabata wordo publica. Asina tabata actua si berdad tin incumplimento. A bishita un of mas bar restaurant y a cera esaki pasobra no ta permiti e bebemento riba otro. Gobierno a anuncia den conferencia cu ta take away so. Tambe a bishita diferente supermercado. Pa algun siman a mira cu supermercadonan grandi a cuminsa un control pisa na porta. Tabata chek temperatura y tambe zorg pa tur man di garoshi of macuto wordo limpia cu alcohol prome cu clientenan pone man riba dje. Esey no ta tur tabata haci.
Ta un exigencia. Poco poco e reglanan a bira mas estricto. No ta laga tur hende drenta pareu. A palabra cu diferente manehador di supermercado cu no por laga hende drenta pa loco pa cana rond. No ta laga tur hende drenta pareu. Ta haci e control na entrada y asina poco poco clientenan ta drenta. Pafo ta crea un rij cu por ser mira na diferente Supermercado of negoshi. Cantidad di cliente so ta permiti pa drenta. Pafo mester mantene distancia. Parti paden e reglanan tambe tey. A obliga tur doño pa traha un ruta pa e clientenan. Bo ta drenta e supermercado y sigui e ruta pasando full e supermercado sin topa cu otro cliente den bo caminda. Un entrada y e ruta ta hibabo na final te na caha y salida. Eynan diferente supermercado a haya nan mes den un problema serio. A cera e supermercadonan pasobra entre otro nan no ta mantene nan mes na e maneho di precaucion. A haya clientenan ta cana tur caminda den e localidad, nan tin un solo entrada, y falta di higiena entre otro cuminsando for di pafo a hunga un rol. Awor a mira cu diferente supermercado a aplica reglanan nobo na entrada pa asina nan por keda habri y pasa e control y exigencianan di e Taskforce.
Diabierna mes a cera Hong Kong na Paradera y Diasabra el a habri caba. A papia cu algun chines cu a splica cu nan tin un solo entrada y esey a causa problema. Awor nan ta bezig ta habri un otro entrada pa asina tambe por laga clientenan drenta di un porta y sali di otro. Supermercadonan chikito cu tin dos entrada a scapa. Of Supermercadonan grandi cu a aplica regla mesora di seguridad a sigui duna servicio.
Den area di Pavia, Paradera, Santa Cruz etc a mira varios Supermercado cu a cera. A mira papelnan poni riba porta cu Dialuna lo habri bek. Esey ta ora cu nan haci e cambionan necesario. Di otro banda bisiñanan ta expresa cu nan no kier Sali bay leu di cas cu Shelter in Place. Pesey ta spera cu e supermercadonan cerca di nan cas wordo habri bek pronto pa asina nan tin nan cosnan cerca di cas. E controlnan lo sigui dialuna den otro areanan di nos isla.
