Diabierna marduga, den careda di 1:30 am, polis mester a presenta na un club nocturno cu ta situa den Kammerlingonestraat, na Tanki Leendert. Esaki tabata debi cu tabatin un problema tumando luga.
Na dicho luga un homber a yega y na momento cu el a drenta den e club nocturno, el a bay agredi e pareha nobo di su ex-pareha. Esunnan cu a presencia esaki di biaha a pidi asistencia policial.
Polis a presenta na e sitio y a purba calma e situacion. Pero como tabata trata di un acto di agresion, polis a bay over na detene e persona y transport’e pa warda policial unda a atende cu ne riba su comportacion. Na warda di polis a present’e dilanti un subfiscal.