Hit and run: Plach’i number cu a keda atras a red’e

2935

Diasabra anochi alrededor di 8:00pm a sosode un caso di hit and run den Madiki. Esaki a tuma luga na altura di Madiki 45, unda un Toyota Yaris a pasa dal un auto para pafo di un cas. Como si fuera poco, e chauffeur di e Yaris a sigui su caminda manera nada a pasa. 

Suerte no tabata cu e chauffeur aki, mirando cu e plach’i number di e auto a keda atras. E plachi ta numera: A-76896 y e auto cu el a dal ta un Hyundai Accent numera A-34342. Polis a bay controla unda e auto ta registra y a topa cu e Toyota Yaris color blauw den Rudolf Arendsstraat.

Ora cu polis a cuminsa controla rond di e auto, algun persona a presenta y introduci nan mes como doño di e auto. Mescos cu e accidente na Calabas, nan tambe a conta cu a fia un familiar e auto. A yama e dicho persona pa presenta bek na e cas unda a laga e auto.

Diescinco minuut despues el a presenta, a deten’e y transport’e pa ward’i polis. Pa colmo e ta un menor di edad, pues no tin rijbewjis. Na final polis di trafico tambe a presenta na sito djey a takel e hib’e warda di Balashi. E Yaris tabata tin sla parti dilanti, pues ta cuadra cu e daño na e Accent den Madiki.