Tabata awe mainta pa mas o menos 11:00am cu a pidi asistencia urgente di Polis y Ambulance pa un ciclista cu a dal tras di un auto marca BYD color blanco numera A-55401 riba e caminda di Yara na Savaneta. E ciclista, Edgar Colina tabata herida na suela, pendiente asistencia medico di ambulance, cu a transport’e cu maximo urgencia pa Hospital.
Investigacion di Polis lo mester saca afo kico exactamente a sosode y con bin e ciclista, cu tin un trayecto den ciclismo caba, por a pega asina duro tras di e auto. Na e sitio Polis a constata cu ainda e “signal light” di e auto tabata cendi, indicando cu el a indica cu e lo lora. Loke no sa ta si el a haci esey diripiente, sin cu e ciclista lo por a ripara.
Algun ciclista experencia a splica nos cu tin un tendencia bou di e ciclistanan, di pega tras di un auto, esta di core hopi cerca, pa evita e biento contrario. E estilo di core aki tin su risico cune, manera esaki, por ehempel si e auto cera brake diripiente. Den caso asina e ciclista no ta haya tempo pa e brake, specialmente si ta coriendo asina cerca di e auto su dilanti y mayoria bez cu velocidad halto.
Fuentenan a indica cu na Hospital a trata e victima cu e urgencia necesario y a somete na un operacion cu a dura mas o menos 7 ora largo. Ey a saca afo cu el a kibra ambos pia, ambos man y hasta schouder. E bon tabata cu e tabatin su helm bisti, loke a protega su cabes di sla. Hopi biaha den tipo di accidentenan asina, ta sla na cabes ta locual por hinca e victima den problema serio, cu por resulta hasta fatal si kibra nek.
Durante e operacion a uza hermentnan pisa pa pega e pia y brasa bek na otro. Cu e intervencion aki, e ciclista lo mester drumi pa un tempo riba caba y evita movecion. E no ta interna den cuido intensivo, sino den camber riba piso mes, den cual e por cura trankil y ricibi su tratamento prescribi pa su specialista.
