Tin un tension grandi den baho mundo riba un cargamento di cocaina corta. Hasta tabatin tiramento riba un cas na Almere, segun publicacion di De Telegraaf. Tambe a pone un handgranaat na un di e casnan.
Dia 11 di october a sefta un cas na Almere cu bala. Polisnan ta investigando un tip cu nan a haya relacion cu un robo grandi di droga y si e tin di haber cu e tiramento ey. Na fin di luna pasa e droga a disparce for di un deposito. Ta papia aki di 400 kilo di cocaina.
Dia 11 di october a haya un handgranaat poni dilanti un cas den Fijistraat (Almere). A pone camara na diferente luga strategico den e ciudad aki.
Tambe a papia di un cargamento di otro 200 kilo di cocaina cu a disparce recientemente, pero no sa si ta trata di e mesun caso.
Droga na beach
Polis tambe a descubri 300 kilo di cocaina den un boto y otro 50 kilo riba beach. Esaki a tuma luga na e haf di Zeeiws-Vlaamse Breskens. E droga tabata scondi den un area di deposito di un boto. E tripulantenan di e boto, cu ta tres homber di Urk, Kampen y Zwolle, ta deteni. Boto y cocaina ta confisca.
Polis ta sospecha cu e trio a pisca e cargamento for di Westerschelde, despues cu e cocaina abordo di un barco di carga a pasa esaki pa nan.
Despues di e descubrimento aki, a bin haya un tas riba e beach di Zoutelands cu mas o menos 50 kilo di cocaina. Polis ta sospecha cu ambos cargamento tin di haber cu otro y ta procedente di e mesun barco di carga.
A rista cas di e tres hombernan.
