Grupo Scout St. Paulus-Michael di San Nicolas a tene un biaha mas su tan gusta vacation camp cu tur su unidadnan. E vacation camp a inicia riba diabierna 5 di juli cu un tremendo campamento na Centro SKA cu e unidadnan di Verkenner y Explorer. Nos hobennan a yega cu tur nan materialnan, tent, etc cu hopi entusiasmo pa comparti e weekend hunto como un gran famia scout.
Diasabra e unidadnan di Bever y Welp a uni hunto cu e otro unidadnan y a forma asina un grupo grandi y hunto cu tur e lidernan a bai pasa un dushi dia na Aruba Vacation Waterpark na Hooiberg. Tur nos muchanan y hobennan a gosa di tur e piscinanan, slidesnan y na final a saboria un dushi almuerso.
Riba e mesun diasabra atardi a tuma lugar e parti oficial cu instalacion di un Verkenner y e parti di zwemover y overvliegen di algun Bever y Welp. Mayornan por a presencia e bunita ceremonia aki di nan yiunan cu ta sigui crece den e ramo di scouting.
Palabra di danki ta bai na e mayornan y lidernan di Grupo Scout St. Paulus-Michael cu a haci e proyecto aki posibel. Mas cu claro tambe na ATHA pa e aporte financiero. Pasa un dushi vakantie muchanan y hobennan! Pa mas informacion por sigui nos riba nos pagina di facebook: https://www.facebook.com/stpaulus.michael
