No ta un ni dos, sino e gran mayoria di gremionan comercial di Aruba a uni pa manda un solo carta di protesta na Gobierno di Aruba, specificamente na Minister Presidente, mr. Evelyn Wever-Croes. Ta lamenta cu di un banda ta promove transparencia, specialmente den e dialogo cu Hulanda, pero di otro banda te dia di awe e gremionan no a haya copia di e contraproposicion cu Gobierno di Aruba a manda Hulanda dia 16 di juli ultimo pa por logra e fiansa di 204 miyon florin.
E gremionan cu a uni pa manda e carta di protesta aki ta San Nicolas Business Association (SNBA), Aruba Trade & Industry Association (ATIA), Aruba Hotel & Tourism Association (AHATA), Aruba Chamber of Commerce and Industry (KVK), Aruba Food & Beverage Association (AFBA), Aruba Car Dealers Association, Aruba Jewelers Association, Aruba Timeshare Association, Comerciantenan Uni Aruba, Werkgeversvereniging Arubaanse Bouwnijverheid (WAB) y Insurance Association Aruba (IAA).
E gremionan ta acentua cu pa por conta cu nan sosten, ta importante si pa practica transparencia y comparti e informacionnan necesario durante henter e proceso di negociacion. Pesey ta urgi Gobierno pa comparti e contraproposicion cu nan a manda pa Gobierno di Hulanda. Tambe nan kier mira e Master Plan cu Gobierno di Aruba a laga traha den cuadro di e plataforma nacional y cua elementonan di e reforma proponi, ya ta den pleno ehecucion caba.
E gremionan comercial di Aruba ta consciente cu mayoria di e locual Gobierno di Hulanda a propone comol condicion pa por fia Aruba placa, ta proposicionnan cu varios otro organisacion internacional (p.e IMF) a yega di haci den pasado caba. Es mas, den e discurso di Minister Presidente Wever-Croes dia 15 di juli ultimo, el a menciona cu Aruba mes lo tuma e medidanan necesario pa yuda nos pais surpasa e crisis. Consecuentemente, dor di tin un proceso transparente den comparti contenido di e implementacion di e Master Plan, ta demostra disponibilidad y disciplina den tuma accionnan pa crea un Aruba mas resiliente.
E gremionan a enfatisa cu, sin e subsidionan cu ta provee awor aki na e industria comercial di nos pais, cu nos economia lo crash. Pesey, gremionan ta sostene e caminda di dialogo y ta spera sinceramente cu Gobierno di Aruba y Gobierno di Hulanda lo yega na un acuerdo pronto.
