Pa prome biaha Nos Fortalesa Montessori Aruba ta organisa un fundraising bingo pa sigui desaroya e school mas aun y hasie mas accesibel na e comunidad di Aruba cu programanan adicional y training pa nos maestranan.
Recientemente e directora di e school a anuncia cu lo comparti e fondonan cu genera cu St. Maarten Montessori School mirando cu ela sufri basta daño pa motibo di e horcan Irma. “Nos plan inicial tawata pa genera fondonan pa sigui desaroya nos maestranan atraves di training nan online y/of den exterior. Tumando na cuenta e situacion lamentable cu a sosode na e Montessori School na St. Maarten, nos a dicidi di comparti e fondonan cu nos coleganan.” Sra. Jessica Piña, directora di Nos Fortalesa ta remarka. E grandioso bingo lo tuma lugar ariba 30 di September cuminsando pa 8:00pm na Club Caiquetio, registracion lo habri pa 6:30pm. Premionan ta varia entre Awg. 150 y Awg. 2,000.
Lo tin diferente otro premionan y doorprizes. Ticket nan ta disponibel serka tur alumno y na school mes te cu diahuebs, un ticket ta costa solamente Awg. 10 pa un. Bukinan pa companianan tambe ta disponibel, por tuma contacto na [email protected] si kier contribui na e bon causa aki. Nos lo tin un cushina bon surti, incluyendo un tremendo snack box y sin laga afo e aroz con pollo y hopi mas. Ta invita famianan, amigonan, bisinjanan y coleganan pa pasa un rato placentero hungando Bingo cu chens grandi di gana premionan cash.
