Por lo pronto e kontratista prinsipal Ballast Nedam ta riba skema pa loke ta konstrukshon di e hospital nobo. Manera a anunsiá anteriormente, e parti mas rudimentario di e konstrukshon ta virtualmente tras di lomba.
Awor a kuminsá ku e proseso pa akabá e trabou loke lo dura un aña mas, pasobra esaki ta un proyekto sin presedente pa Kòrsou. Di pafó e edifisio originalmente tabata parse un blòki grandi di betòn. Pero gradualmente e proyekto di HNO a kuminsá haña mas forma. Ora nan a kuminsá instalá ademas e bentananan, ya e hospital den konstrukshon a kuminsá haña mas i mas e imágen di un edifisio nobo impreshonante. Na e aspekto ei resientemente nan a dun’é un dimenshon èkstra, pasobra na sierto muraya parti pafó di e kuater alanan, pero tambe paden den gang i sierto kambernan a agregá diferente koló. Awor, pa loke eskoho di koló semper por eksistí diferensia di opinion, pero echo ta si ku e kolónan aki ta duna e proyekto di konstrukshon inmenso aki mas ouge i ta hasi’é mas atraktivo. E potrètnan aki saká pa Ballast Nedam ta mustra kon e kolónan ta pone e betòn biba mas.
