Maneho di Minister di Deporte, Dangui Oduber, ta dirigi un gran parti riba e mantencion di infrastructura di facilidadnan deportivo pa por haci deporte mas accesibel pa un y tur. Apesar cu no por conta cu sosten di Lotto pa Deporte, Minister Dangui Oduber ta trahando ariba un maneho di deporte cu ta na bienestar di e deportistanan.
Den e proximo lunanan Minister Dangui Oduber lo invita cada un federacion deportivo pa scucha nan necesidadnan y pa yuda nan desaroya nan deporte. Arubaanse Voetbal Bond (AVB) ya caba ta e prome instancia deportivo cu a haya e chens di reuni cu Minister y deliberariba plannan pa futuro.
Den cuadro pa aumenta e participacion den deporte di futbol, specialmente bou di hende muhe, Minister por medio di IBiSA lo incorpora un maneho caminda lo intensifica e programa di futbol pa hende muhe. Esaki lo cuminsa via deporte escolar cu sosten di AVB. E aña ki lo expande e cantidad di weganan di Olimpiada Escolar den categoria di mucha muhe cuminsando cu futbol y lo continua di haci mescos pa otro deportenan.
Minister a haci palabracionnan concreto cu federacion di AVB pa insitui un comision cu ta consisti di stakeholders manera Ministerio di Deporte, AVB y demas organisacionnan goburnamental cu ta di importancia cu meta pa traha un plan encuanto construccion y mantencion di facilidadnan di futbol pa bini na remarke pa ricibi fondonan di FIFA.
Ta un lastima pa mira con e sentencia di Hues den e caso di Lotto ta dunando forsa na instancianan concerni cu mantencion di facilidadnan Deportivo pa asina stroba desaroyonan den deporte. Aruba tin diferente facilidadnan deportivo cu ta haci falta di mantencion. Por ehempel, e veld di futbol na Dakota, esta Stadion Guillermo Trinidad ta afgekeurd pa CONCACAF. Parke Curazon na Jaburibari ta un otro facilidad masha popular pero alabez peligroso pa falta di mantencion. Sin lubida cu algun siman atras durante un wega caminda tabatin muchanan ta practica nan deporte un palo di luz a kita cay riba veld den pleno accion di wega.
Infrastructura di facilidadnan Deportivo ta den decadencia, segun e mandatario. Interes politico a prevalece riba deporte. Lamentablemente e maneho actual di Lotto no ta para tras di e proposito cu a fund’e.
Minister Dangui Oduber y AVB ta contento y satisfecho con e reunion a bay y ta mas cu dispuesto pa traha cu otro pa yega na un meta, cu ta na bienestar di nos deportistanan.
