Gobierno di Aruba ta lamenta e accion di Sindicato di Polis diasabra anochi basa riba un expresion di otro lider sindical cu un si lo mester entrega pero e otro no. Pa e motibo ey e Sindicato di Polis, sin tin informacion corecto, a dicidi di pone trabou abou y pone orden publico na riesgo. Gobierno di Aruba ta declara enfaticamente cu empleadonan di Hospital tambe ta entrega.
Sinembargo Sindicato di Polis no por compara polis cu ta ambtenaar, cu empleadonan di Hospital cu no ta ambtenaar y no tin tur e beneficionan primario ni secundario cu polisnan y demas empleadonan publico tin. Tin hopi diferencia entre e dos gruponan aki: salarionan, overtime, vakantie, ATV, indexering, back to school premie, bashi premie.
Esaki ta e motibo cu Hulanda desde un tempo caba ta poniendo presion riba Gobierno di Aruba pa baha e gastonan di salario di e empleado publico. Y ta pa e motibo aki Gobierno di Aruba mester a atende prome cu empleadonan publico mesora. Y a traves di e diferente fundacionnan Gobierno a atende e entrega di salario di empleadonan di institutonan semi-publico. Empleadonan di Hospital tambe ta entrega mescos cu ta wordo spera di tur trahado na instancianan publico y semi-publico na Aruba.
“Nos pais ta den crisis awor y durante e crisis aki nos ta conta riba esnan cu mester mantene nos hendenan salud y sigur. Awor no ta e momento pa un accion asina. Un accion asina no tabata necesario si a simplemente puntra prome. Ademas, nos a haci un cita caba cu e sindicatonan pa reuni otro siman. Mi ta haci un apelacion riba un y tur pa nos laga sano huicio prevalece. E crisis aki a causa hopi dolor na hopi famia cu a perde tur cos. Ta pidi un aporte di 5% na unda otro trahadonan a perde hopi mas. Mi ta conta cu nos por mustra cu nos ta un pueblo civilisa y solidario cu otro. Un cos si, orden publico mester wordo manteni y mi ta conta cu Cuerpo Policial lo carga su responsabilidad den esaki”, Minister President Evelyn Wever-Croes a duna di conoce.
