Na e momentonan aki Aruba ta den un crisis unda cu companianan ta mandando trahadonan cas. Pa esaki Gobierno di Aruba a bin cu un Fase Helpdesk (Fondo di Asistencia Social di Emergencia) pa yuda tur ciudadano cu a perde entrada of perde nan trabou. Minister di Asuntonan Social y Labor, Glenbert Croes, a indica cu a dicidi di lanta un fondo di asistencia pa yuda cada ciudadano pa luna cu e suma di 950 florin.
Pa 3 luna lo ta yudando cu e gesto aki
Tur instancia financiero lo yuda coopera pa no perhudica niun hende den e crisis. Tambe e mandatario a duna instruccion na Huur Commissie cu no ta permiti pa saca niun hende for di nan cas of apartament durante e periodo di crisis. Pa por yuda tur hende a bin cu un linea central di e Fase Helpdesk pa yuda tur hende cu a perde entrada of trabou. E number cu por tuma contact ta na 2800707 y tambe por bay riba www.fasehelpdesk.com cu ta situa na DPL.DAO tin e instruccion di Minister Croes cu no por duna permiso di kita hende (ontslaag vergunning) y ta urgi tur dunado di trabou pa no kita hende, pero pa purba yega na un entendimento cu trahadonan.
Gobierno ta contemplando cu 25 mil ciudadano lo ta sin entrada. Pa esaki Gobierno ta comprometi bou circunstancianan sumamente dificil pa cumpli y sigura cu tur hende por tin un suma pa biba cun’e, tin awa, tin coriente, telefon, wifi, gestonan di banco, cuminda. Esaki ta momentonan cu nunca a premira cu e pais lo enfrenta. E mandatario a bisa cu nan ta bay asina leu y a duna e ehempel cu si dunado di trabou bisa di paga 500 florin pa luna so, Gobierno lo percura pa complementa e suma aki pa yega na 950 florin.
Gobierno lo keda vigilante pa esnan cu kier abusa di e sistema aki den e momentonan dificil. Tin un grupito di empresario cu lo kier abusa di e sistema aki, pero tambe trahadonan cu kier abusa. Tin DAO, DPL, DAS y Plataforma Nacional di Trabou (PNT) lo ta coordinando pa continua y sigura cu tur hende bin na remarca na e suma cu ta disponibel inmediatamente.E idea di e fondo di asistencia social ta pa rendi y yega na esunnan cu realmente no tin entrada. Kier evita abuso, gobierno lo percura pa haci nan empeño pasobra na final e placa aki ta di pueblo. Esunnan na Aruba no ta solamente yiunan di tera of cu ta trahando legalmente na Aruba. Tin un grupo grandi di hende cu ta ilegal. Segun minister Croes nan ta yegando na un areglo apart via instancianan internacional cu apoyo di Gobierno di Aruba. Ta mirando den ki forma por duna ayudo humanitario na esunnan cu por ta ilegal na Aruba.
