“E no lo ta facil, lo hereda hopi reto, hopi cos cu no ta facil”, asina e conocido specialista dr. Ike Posner a contesta ora a puntr’e su conseho na e futuro Minister di Salubridad Publico. Israel Posner a sirbi nos pais como Minister di Salubridad Publico den Gabinete Henny Eman III, entre aña 1997 y 2001 den e coalicion AVP-OLA. El a sali di politica y despues di esey a sigui traha como specialista den maneho di dolor y como anestesista. E ta traha como specialista for di aña 1980 caba na hospital y despues 2019 na ImSan.
E specialista a bisa cu tin varios reto pa surpasa pero e ta conseha e minister y gobierno nobo pa no enfoca riba tur. Pasobra e realidad ta cu lo bo drenta cu reto y dia bo sali ainda tin, pues den cuater aña ta mucho poco pa soluciona tur cos. Pesey ta importante enfoca loke ta mas urgente, mas eficiente y mas facil pa soluciona, banda cu e enfoke mester ta pa baha gasto y haci bida di e pashentnan mas facil.
Un di e gastonan mas halto den cuido na Aruba awendia ta tratamento di dialisis. Aruba tin un problema serio di diabetis y presion halto, cu ta traduci den mas pashent cu mester dialisa tres of cuater biaha pa siman. Y esey tin un costo hopi halto. Tin caso den cual no tin suficiente espacio pa dialisa, cu AZV ta hay’e ta manda e pashentnan aki te Colombia of otro pais pa ricibi e tratamento.
Dr. Posner ta sugeri e gobierno nobo pa manda un delegacion diplomatico y medico pa Colombia pa convence nan pa realisa operacion pa transplante di riñon pa Aruba. Awor aki Colombia no ta haciendo esey y na Hulanda e ta costa miyones, spera cu mester warda 3 pa 5 aña pa por haya un riñon. E specialista ta kere hasta cu, na cuminsamento, meste ofrece Colombia pa nos bin cu nos mesun riñon y nan ta djis reemplas’e den un operacion. Hopi biaha tin un famia cu ta dispuesto pa entrega su riñon na un otro. Haciendo esaki lo baha hopi gasto na Aruba di dialisis y di un cantidad di otro gastonan di cuido cu ta bin acerca ora cu tin retonan cu riñon.
Un otro necesidad urgente, na opinion di e specialista y ex-minister ta un policlinica pa pashentnan psikiatrico. Awo tin un policlinica pa pashentnan diabetico pero e retonan den psikiatria ta hopi awendia, specialmente bou di hobennan. Si no actua na tempo y urgente, nos lo haya nos den basta reto cu salud mental nos dilanti.
Dr. Ike Posner ta convenci cu un cambio den maneho lo traduci den baha gasto, den spaar riba algun gasto pero den ofrece mas y miho cuido riba termino largo. Kisas awo lo inverti den transplante di riñon por ehempel, pero lo spaar añanan di cuido y dialisis cu no lo ta necesario mas. Mescos awendia, orguyosamente, ImSan ta realisa varios operacion cu antes pashentnan mster a bay Colombia pa por a haya e cuido aki. Asina nos ta baha gasto, ta gana mas experiencia na cas y e pashent ta sintie miho door di keda cas y bira bon aki mes.
