Recientemente e candidato di AVP Maurits Malmberg a gana un caso cu el a entabla contra Gobierno di Aruba pa motibo cu el a wordo retira.
Segun por a compronde, e hoben politico aki durante aña pasa a haya un contracto pa bay traha na Departamento di Labor, y tabata na disposicion di Ministerio di Asuntonan General. Pero na momento cu Gobierno a cambia, e partnernan nobo a dicidi cu no ta honra e contracto aki.
El a cuminsa cu un contracto na Europe House y despues a bay direct pa Ministerio di Asuntonan General. E prome contracto cu el a haya ta papia cu e ta resorta bou di Ministerio di Asuntonan General, Ciencia, Innovacion y Sostenibilidad den funcion di colaborador den Management di Europe House, y pa duracion di e periodo di Gobernacion di Gabinete Mike Eman II.
Na december ultimo el a haya su contracto di retiro y den esaki a inform’e cu su contracto a vence dia 31 di october, 2017, ora cu e Gobierno anterior a bay. E contracto nobo cu a wordo otorga na dje na Departamento di Labor den seccion di Retiro (DPL), no ta wordo honra door di e Gobierno nobo. Den e mesun carta ta bis’e cu e ta dun’e un luna di pre-aviso y cu e retiro ta bay na vigor pa 31 di januari, 2018.
E demanda di Malmberg tabata pa e wordo poni bek den e fusion di colaborador den seccion di retiro na DAO y pa sigui pague su salario te ora cu e contracto wordo finalisa di un forma legal. Tambe nan a pidi un adelanto, di 109.560 florin, riba e suma di daño y perhuicio, of loke Corte ta considera husto, pa e finalisacion inhusto di e acuerdo laboral.
Corte a bisa cu Gobierno mester mantene su mes na principionan di bon Gobernacion. Hasta si e acuerdo no ta mara na cierto articulo di ley pa esnan cu ta traha cu Gobierno. Pues mester a comporta su mes manera un bon doño di trabou.
Corte a bisa cu e demandante door di su ambicionnan politico, ta dificil pa e haya un trabou den sector priva. No a keda demostra cu Gobierno a tene cuenta cu esaki debidamente y cu den e carta di retiro no a wordo splica pakico e ta wordo kita di trabou. E retiro tampoco a bay compaña pa un oferta di compensacion. Tur esaki ta haci cu e carta di retiro no ta cumpli cu e normanan, y aceptabel.
Teniendo cuenta cu tur e aspectonan ya menciona, a ordena pa tuma den servicio cu forsa retroactivo te cu prome di februari, 2018, te ora cu un que otro wordo dicidi otro den bodemprocedure. E salario aki no mester wordo paga mas na momento cu Gobierno caba di paga e “afkoopsom” di 27.500 florin. Esaki mester sosode no mas tarda mañan, pa 16 di mei, 2018. Si no haci e pago aki, mester sigui pague e salario te ora cu paga e suma menciona.
