Gobierno mester duna piscadonan espacio pa por sali tira pisca na luganan indica

2413

Un famia na San Nicolas a bay tira pisca, pero Warda Costa a kita algun obheto di nan. Ebby Kock desde chikito ta tira pisca den profundidad y seco. E situacion cu Aruba ta den dje na e momentonan aki, a pone cu hopi famia a yam’e pa yudansa. Na su cas e no tin cosnan pa yuda otro, pero su ofishi ta uno cu a pasa den henter su famia y esey ta pisca.

Pa 5 dia largo e ta baha den lama mainta trempan p’asina hendenan por haya cuminda merdia. Kico cu e por haya aworaki den awa ta bon bini, pasobra tin hopi boca pa alimenta. Segun Kock, tin hopi famia na San Nicolas cu practicamente no tin nada.

Pueblo tin hamber: Gobierno mester duna espacio pa por sali tira pisca na lugar indica

Posted by 24ora on Saturday, April 18, 2020

El a baha na cabes di Sero, pero door di e coriente duro el a baha na Nanki. Hunto cun’e tabatin un mucha homber chikito, kende e ta train pa tambe por bay lama y dia di mañan por defende su mes.

Nan a topa cu Warda Costa, kendenan a bisa cu ta bay cu e materialnan di trabou cu nan ta uza. El a bisa cu tur papia a bay bon y a compronde cu Warda Costa ta haci nan trabou. Polis tambe a presenta y e situacion tabata bou di control. Segun Kock, a bisa cu piscadonan por bay pisca, pero e no ta un tirado y no tin pasenshi pa tira linea y warda. Tin hopi famia y pa bay warda 6 ora pa gara un pisca, di cual den 1 ora e ta gara 40-60kg di pisca pa hopi famia come.

E ta bay cu un tripulante di 2 pa 4 hende, depende kico e ta bay haci. Desde awo padilanti e no por haci esey, pasobra nan a bay cu su cosnan. E por traha mas armacion, pero e kier sa ki garantia e tin cu nan lo bolbe bay cu nan. Un pregunta cu e tin na Minister President ta cu e si tin coy come pero otronan no tin y no ta papia pa su mes sino pa San Nicolas completo.

Segun Kock, Minister Chris Romero a lanta den mesun bario y tambe a tira pisca. Minister Romero a priminti nan di yuda cu e caso aki. Minister Glenbert Croes a yega na su cas, buscando voto y a priminti nan pa haci e cos aki uno legal. Tambe e ta recorda Minister Andin Bikker, kende a bisa cu e si ta bay logra legalisa esaki pa nan, pero ainda nada.

Hopi ta creciendo y no tin otro manera di haci. E ta kere cu den e crisis aki tur esnan cu ta bay lama pa duna nan chens di haci esey. No ta tur hende por haci hop cos ya cu tur hende tin otro donnan. E ta pidi pa duna otronan chens, pasobra hopi famia no tin. E ta haya cu mandatarionan no ta pasa den dolor cu nan ta pasando aden. Mandatarionan no ta esnan cu sacrifica y ta bay na cas di hende pa hiba un saco di pisca di 2kg, 1kg y mira con nan cara ta forma.

Mandatarionan no ta wak pa pueblo, pero e pueblo mes ta wak pa pueblo. E cantidad di pisca cu el a coy no ta bay yega pa un famia di 5, aunke e sa cu nan ta ilegal pisca ta pisca. A trece aden loke cu tabata por pasobra despues di a mira Warda Costa a laga e otronan. Otronan ta depende di Kock pa yega p’asina merdia nan tin algo di come.

E ta sinti cu gobierno por haci un exepcion y ta pidi Prome Minister of Andin Bikker cu den e temporada aki pa nan yuda esnan cu mester. Si kier pone tiramento riba pisca ilegal despues di cuarentena, nan lo accepta esaki. Den e temporada aki Kock ta pidi mandatarionan pa laga nan yuda pueblo, pasobra tin hopi bario. E piscadonan kier nan armacion bek. Pero ta pidi pa mandatarionan pone man na curason p’e temporada aki y lag’e yuda su hendenan.