Despues di algun dia deliberando solamente internamente, pero tambe tabata tin algun reunion cu gobierno, sindicatonan di trahadonan publico, diahuebs mainta a yama un conferencia di prensa pa asina duna un update pa loke ta e situacion di e tema di indexering.

Segun vocero Edward Maduro, presidente di SADA, a comenta cu nan a bin haya un prome propuesta di gobierno despues di casi ocho luna, unda cu nan a bin ofrece un aumento riba e premienan cu ta paga anualmente desde e protocol di 2014, un aumento di 303 florin cu lo drenta na vigor na 2025.

Sindicatonan ta cla pa mas accion riba indexering

Sindicatonan ta cla pa mas accion riba indexering

Posted by 24ora on Thursday, November 14, 2019

E sindicatonan a manda un carta pa gobierno indicando cu e propuesto aki no ta aceptabel y a neng’e categoricamente, mirando cu despues di tanto luna cu a bin ta reuniendo, locual cu a haya eynan, por consider’e como un insulto na e ambtenaarnan.

No obstante esaki, internamente tabata tin algun reunion di sindicatonan. Segun Maduro, dia 5 di november a reuni cu gobierno y aki a bin cu un contrapropuesta pa loke ta trata e punto di salida cu nan tabata tin di 3.6% pa loke ta indexering.

Den e contrapropuesta aki, a informa gobierno, cu apesar di tur cos, apesar di no tabata wordo trata na e manera mas diligente pa loke ta e tempo cu ta bin perdiendo pa loke ta e discusionnan di indexering, a dicidi pa bin cu e contrapropuesta na gobierno. Esaki ta bisa cu e sindicatonan ta dispuesto pa desvia di e 3.6% y ta pidi pa gobierno duna un ahustacion di 2.4% den e salario, cuminsando logicamente dia 1 di januari 2019, manera cu a palabra den e protocol di 2014.

E restante di e 1.2% a bisa gobierno, cu esaki ta bira tarea di e comision cu tin cu institui ainda, ta wardando ainda riba e MB pa e comision aki haya bida. Pero e 1.2% aki, e diferencia di e 3.6%, no lo bay lag’e bay perdi sin mas. Esey lo bay bira tarea di e comision pa asina mira den ki manera lo bay compensa esaki pa loke ta trata 3.6%, cual tabata e punto di salida di e sindicatonan.

Tin cu remarca, segun Edward Maduro, cu e 3.6% aki ta nan punto di salida pa indexering den salario. Logicamente e propuesta di gobierno a desvia completamente di esaki, pasobra nan kier a duna un aumento di solamente 0.6% y tambe nan kier a hink’e den e premienan. No den salario manera cu tabata peticion di e sindicatonan y conforme cu e protocol di 2014.

A bisa gobierno cu nan kier haya un contesta uiterlijk diamars cu a pasa, pa mira kico lo bay ta e reaccion di parti di gobierno.

Lamentablemente gobierno no a duna un contesta fiho, pero si a pidi mas tempo y a pidi e sindicatonan pa duna nan un espacio di un siman mas pa asina pa dia 19 di november, duna un contesta riba esaki.

A base di e reaccion di gobierno, e sindicatonan a reuni internamente y a bisa cu no por keda duna tempo, mirando cu a duna gobierno hopi tempo caba y a warda mas cu 8 luna. A tuma un tiki tempo di mas caba. A informa gobierno diaranson cu a pasa den un carta cu a manda, pa bisa nan cu e sindicatonan no lo bay warda te otro siman diamars, dia 19 di november. A duna nan un biaha mas 24 ora di tempo, te cu diaranson atardi pa reacciona riba e carta di e sindicatonan y por bisa cu en berdad a bin haya reaccion di gobierno, unda cu a bisa nan cu nan ta tratando, nan ta haciendo e calculonan pa por bin cu un propuesta nobo y for di eynan a bisa e sindicatonan cu en bes di dia 19 di november, nan lo bay yama e sindicatonan pa un reunion y tambe pa asina presenta e posibel propuesta nobo di gobierno diabierna durante e Conseho di Minister cu tin tur diabierna mainta.

Tambe, den e carta eynan, e prome minister a informa cu lo bay haya tende di e orario, pasobra e fecha di diabierna ta fiho, e orario ainda nan no por a confirma. Si por bisa cu a tende for di secretaria di Ministerraad cu awe durante dia lo bay haya e orario di e reunion di mañan pa asina gobierno por presenta nan posibel propuesta nobo contra di loke e sindicatonan a presenta dia 5 di november.

Cu esaki, e sindicatonan a informa, cu di nan banda, cu mirando tanto tempo ta transcuriendo y por mira hopi staff no a bay y pa esaki tin cu informa cu ya caba ta den deliberacionnan pa asina yama conhuntamente e cinco sindicatonan, hunto bay yama un reunion extra ordinario, tur miembro di e sindicatonan TOPA, SPA, SADA, SIMAR y SEPPA, pa informa nan kico ta sosodiendo y mas ainda, gobierno lo bin cu un posibel propuesta nobo.

Otro siman no a confirma ainda e fecha, pero si mester cuminsa na avisa y informa tur miembro di sindicatonan, tur e ambtenaarnan, pa keda pendiente cu otro siman, lo ta yamando e reunion aki cu tur e miembro di e sindicatonan aki pa asina informa nan formalmente den un reunion, kico tur a haci te awor aki y tambe duna nan e espacio pa nan expresa nan mes na e sindicatonan y tambe hunto tuma un decision.

Diabierna lo bay ta hopi importante pa e sindicatonan pa mira kico gobierno lo bin cun’e y pa asina tambe dicidi e orario y e fecha cu lo bay yama e reunion pa e miembronan.

Comments

comments