Mientras cu “hedging” tabata un algo masha malo den bista di MEP siendo den oposicion, awe e mesun “hedging” aki ta yuda cu por anuncia un reduccion di tarifa di coriente. Un rato pasa Prome Minister mr. Evelyn Wever-Croes, compaña pa henter Gabinete Wever-Croes hunto cu e Directornan di Utilities Aruba NV, WEB NV y NV Elmar, a anuncia reduccion den tarifa di coriente entrante dia 1 di januari 2020.
Esaki ta posibel como cu Gobierno a instrui Utilities Aruba NV pa “hedge” tarifa di fuel-oil durante henter aña 2020. Asina ta garantisa e mesun tarifa pa 1 aña largo, evitando e opcion cu si tarifa mundial subi durante aña, cu e lo afecta e tarifa local. Ing. Richard Eman, kende ta Presidente y alabes Director di Utilities NV a bisa di a logra esaki dor di cumpra fuel-oil adelanta y a “swap” e prijs. Ta obvio cu el a purba cambia e palabra “hedge” y “swap” comosifuera ningun hende lo sa di kico e tabata papiando.
Prome Minister mr. Evelyn Wever-Croes tabata hopi contento di anuncia, cu despues di hopi esfuerso, a logra un reduccion entre 9.9% y 10.4% pa tur cliente residencial, un reduccion di 7% pa tur cliente comercial (grandi y chikito) y un reduccion di 9% pa tur cliente cataloga como scol, misa y fundacionnan sin fin di luho.
Como cu e reduccion ta drenta na vigor 1 di januari 2020, clientenan lo nota cambio den nan recibo na Maart 2020. E ultimo biaha cu tabatin reduccion tabata na januari 2017, durante Gabinete Mike Eman II.
Ing. Richard Eman, director interino di Utilities Aruba NV a bisa cu a haci un esfuerso grandi pa logra aumenta e dividendo na Gobierno y na mes momento duna un reduccion. Si no mester a duna Gobierno mas dividendo, cu e reduccion na pueblo lo por tabata mas hopi ainda. Pero awor a cumpli cu ambos peticion, pues duna Gobierno mas y cobra pueblo menos. E unico reto ta cu politicamente, Gabinete Wever-Croes a haya nan ta “hedge” prijs di combustibel, coriendo riesgo cu si e prijs mester baha durante aña, kisas dor di eleccion na Merca, cu na Aruba nos lo sigui paga un tarifa halto pasobra a mara e prijs pa henter aña 2020.
