Recientemente departamento di Gele Koorts Muskieten Bestrijding (GKMB) a haya ekipo nobo cu ta permiti mehora nan servicio na comunidad di Aruba.
E team di GKMB a traha un rapport y a haci un peticion na e Minister di Salubridad Publico pa compra di e materialnan necesario pa combati sangura y muskitanan cu ta causa malesa.
Segun Luis Chong, director di GKMB, a splica cu nan a haya dos mashin nobo cu por yuda nan hopi bon cu combatimento di sangura na Aruba.
Ta dos mashin di marca Aleman. Ta trata aki di un inversion di mas of menos 45 mil florin pa e dos ekiponan cu lo wordo uza mayoria parti ora cu tin outbreak di dengue, chikungunya of Zika of ora cu tin molester grandi den bario.No ta trata di mashin chikito cu ta uza na un cas, pero mayoria parti ta uza nan ora cu tin problemanan grandi den e barionan di Aruba. Si haya diferente yamada for di un bario manera por ehempel Savaneta, por uza e mashinnan aki pa combati e sanguranan mas lihe, enbes di pasa cas pa cas.
Manera ya menciona ta dos mashin Aleman, di cual uno ta Ultra Low Volume, cu ta saca un mist, cu ta un tipo di pesticida cu ta combati e sanguranan. E otro mashin ta un Termal Fogger cu ta saca un tipo di huma cu ta penetra mas miho den cierto luganan. Manera por ehempel ora tin problema cu sangura preto den mangelnan, e mashin aki ta ideal pa uza den casonan asina.
Efectividad
E mashinnan aki, segun Chong, ta e ultimo recurso. E trabao mas grandi ta pa pasa cas pa cas, informa e hendenan, pidi comunidad pa yuda, tene nan luga limpi y elimina e criaderonan. Pero ora cosnan bay fo’i man cu tin hopi sangura den un bario, e ora e mashinnan aki ta ideal.
No kier uza nan tur dia, plama e insecticida den gran cantidad por ta den un bario cu no mester. Pero si ora haya notificacionnan di e departamento di epidemiologia di Dienst Besmetelijke Ziektes, cu tin por ehempel hopi caso sospechoso den un bario, e ora GKMB na un manera rapido y cu gran poder, combati e casonan asina.
Andansa
Departamento di epidemiologia y Dienst Besmetelijke Ziektes ta haya cierto meldingnan si tin dengue, zika of chikungunya. Te cu awor aki no tin confirmacion pa cu esaki, segun Chong, pero si ta papia di un andansa pisa cu tin andando. Den e parti ey no ta malesa cu ta wordo transmiti door di sangura. Tin e sospecho pero no por bisa esey ainda. E sospecho ta cu e ta un andansa, un tipo di griep cu ta andando rond y cu ta pega y benta hende abao pa basta dia.
Cooperacion di minister
GKMB ta contento cu e atencion cu nan a haya for di minister. Ora cu a acerk’e cu e proposicion pa inversion, di biaha e tabata di acuerdo cu mester a expande y renoba cierto aparatonan. E no a pensa dos biaha pa haci e inversion aki.
En berdad nan tin bon contacto cu e minister, segun Chong. E ta mira cu e trabao di GKMB ta importante, un trabou di prevencion y esey por elimina hopi trabao despues, cu si no tin e prevencion, tin hopi malesa transmiti pa sangura. E ta wak e importancia t’ey na cuminsamento di e proceso cu por preveni cu tin e transmision di malesa.
Secura
GKMG ta ripara cu ora di secura no tin problema den barionan. Pero asina awa cuminsa yobe, ta haya un piek masha grandi mes di e densidad di sangura. Esey ta mustra cu e curanan a keda un tiki dehado, cu un tiki sushi aden, cosnan tira den cura, manera tire, bari,etc. Cu asina awa yobe, ta haya un gran cantidad di sangura y poco poco e hendenan ta ripara cu tin demasiado molester. E ora nan ta cuminsa check nan cura atrobe y e cantidad ta baha. Ora di secura, si por tene e cura limpi, esey ta un gran ayudo pa ora awa yobe..
E presencia di GKMB
Chong a splica cu nan ta haya varios peticion di parti di diferente scol, y clubnan di servicio ta haci peticion pa nan por duna informacion na e muchanan. Berdad nan tin un personal special pa esaki. Nan ta bishita e scolnan pa duna les y un tiki informacion na e muchanan na nan nivel. Tin materialnan special pa duna e muchanan esaki.
Desaroyonan internacional
GKMB ta sigui desaroyonan den Latino America completo y tambe Centro America actualmente y cu tin brotenan di denge. GKMB ta alerta pa esaki pa asina nan haya cierto informacion cu aki tambe por cuminsa. Te cu awor aki no tin transmision cu dengue. Tin cierto casonan di denge pero no asina alarmante cu Aruba por ta den un problema.
Satisfecho
E team di GKMB ta completo. E aña aki a busca mas material pa siguridad, tambe material pa combati sangura y nan ta full ekipa. Nan tin bon animo pa e aña cu ta bin, Chong a bisa finalmente.
