Gisette Seferina (PAR) ta hasi un apelashon urgente riba minister Alcalá- Wallé (OWCS) pa rekonsiderá e desishon pa para e proyekto di konstrukshon di un ‘shelter’ pa kalamidat na Fuik.
E sentro ta nesesario pa henter area di Bandariba, pa por brinda alberhe temporal na víktima di kalamidat kaminda aktualmente no tin un lugá pa duna apoyo den kaso di un disaster natural o pa kousa di aktividat humano.
“Kasi mi no por a kere ora mi a tuma nota ku tin un grupo ku ke pa para e proyekto bunita di konstrukshon di e sentro di apoyo na Fuik. E grupo aki no por ke e bario di Fuik i restu di Bandariba niun tiki bon!!”. Segun parlamentario Gisette Seferina, e informashon inkorekto, esta ku ta un barak pa detenshon di Venezolano indokumentá eksklusivamente ta bini einan, ta trese un impreshon robés di e proyekto i ta perhudiká e habitantenan di Fuik i e area di Bandariba kompleto.
“Nos pueblo ta na altura ku den henter Bandariba no tin un ‘shelter’ kaminda habitantenan i famianan por haña refugio den kaso di un kalamidat manera un kandela o inundashon?? Nos ta pará atrobe dilanti di e temporada di orkán; na unda e habitante di Bandariba por haña refugio den kaso ku e mester evakuá pasobra tin menasa di mal tempu o inundashon??”
E parlamentario ta mustra riba e hecho ku segun e informashon riba e wepsait di e Direktorado di Kontròl di Riesgo i Maneho di Kalamidat (www.kalamidat.cw), e area di Bandariba de fakto no tin un shelter pa alberhá su habitantenan si no ta te na Stella Maris College na Steenrijk. Esaki ta hasi ainda mas inkomprendibel pa Sra. Seferina ku, pa motibu di informashon inkorekto tokante barak pa Venezolano indokumentá, ke stroba minister Alcalá- Wallé di kumpli ku su tarea di fortifiká e bario di Fuik en partikular i e area di Bandariba en general.
Pa e motibunan aki parlamentario Seferina ke hasi un apelashon urgente riba minister di edukashon, siensia, kultura i deporte, Sra. Alcalá- Wallé, ku netamente a mira e nesesidat grandi pa un ‘shelter’ na Fuik, pa hasi tur esfuerso nesesario pa reanudá konstrukshon di e sentro di apoyo aki mas pronto posibel na benfisio di e pueblo di Bandariba.
